Una OEP insuficiente

Dende SUATEA – Intersindical Asturiana llamentamos la probetaya cifra de places de la OEP 2025. Entendemos que, lloñe d’amenorgar la interinidá, el númberu de places ufiertaes va suponer un aumentu de la tasa de temporalidá na alministración pública y, concretamente, na enseñanza pública asturiana. Les 477 places (453 d’accesu pol turnu llibre) tán mui lloñe de la necesidá d’aumentu de plantía orgánica que los sindicatos docentes llevamos años denunciando. Con un númberu de places que nin siquier da pa compensar les xubilaciones de les persones voluntaries, namás caben dos interpretaciones: o va aumentar la tasa d’interinidá (que nesti momentu supera’l 20%), o va producise una tresferencia d’unidaes del sistema públicu a la rede privada sostenida con fondos públicos que xustifique esti recorte. La primera opción supón que’l gobiernu d’Asturies aposta pola precariedá llaboral de los trabayadores del sistema públicu d’enseñanza, y la segunda implica que l’oxetivu ye la privatización mesma del sistema. Les dos opciones son intolerables ya incompatibles colos planteamientos esperaos d’un gobiernu d’izquierdes.

Por too lo anterior, SUATEA – Intersindical Asturiana refuga esta Ufierta d’Empléu Públicu y pide a l’Alministración que la retire y faiga una ufierta seria pa fortalecese’l sistema públicu d’enseñanza.