Un secretu a voces: el casu del IES Roces

El cursu pasáu, el Serviciu de Prevención de Riesgos Llaborales dictaminó qu’había riesgos psicosociales nel IES Roces. Esta situación, afecta al clima llaboral y al bienestar del profesoráu y l’Alministración nun puede mirar pa otra parte, porque repercute de manera directa na calidá del serviciu educativu. La parte central del problema ye la imposición férrea del equipu directivu de determinaes formes de trabayu.

Amás hai una tendencia peligrosa que venimos denunciando dende qu’entrara en vigor la LOMCE, y que la LOMLOE nun acabó de resolver: la imposición de determinaes metodoloxíes y formes de trabayu. Consideramos qu’estes práctiques suponen un ataque a la llibertá de cátedra y un menospreciu a la profesionalidá de los y les docentes, qu’habíen tener la capacidá d’escoyer les estratexes pedagóxiques que meyor s’adapten al so alumnáu y al so contestu. Pretender imponer modelos uniformes nun solo limita l’autonomía del profesoráu, tamién puen xenerar tensiones qu’acaben agravando los riesgos psicosociales yá detectaos.

El propiu informe del Serviciu de Prevención de Riesgos Llaborales señalaba la necesidá de que’l Serviciu d’Inspección Educativa exerciera un papel mediador pa resolver los conflictos nel centru. Sicasí, hasta agora, nun hubo una actuación efectiva nesti sentíu. La pasividá de la Inspección nun fai más qu’encetar los problemes y deteriorar entá más la situación llaboral y educativa.

El problema agrávase entá más cuando estes metodoloxíes impuestes vienen de la mano de l’entrada d’entidaes privaes na enseñanza pública. Tamos ente un procesu d’esternalización y privatización que resulta tan innecesariu como preocupante. La escuela pública nun pue convertise nun espaciu condicionáu por intereses ayenos a lo educativo nin perder la so independencia en beneficiu d’empreses esternes.

Dende SUATEA esperamos que’l cambéu recién na estructura del Serviciu d’Inspección Educativa suponga tamién un cambéu d’orientación na so actuación. Ye imprescindible que la Inspección apueste pola mediación, la imparcialidá y el diálogu, contribuyendo de forma activa a la resolución de los conflictos y a la meyora del clima llaboral nos centros educativos.

Esiximos, por último, que nun s’ignore l’esistencia de riesgos psicosociales nel IES Roces nin en nengún otru centru d’Asturies. Les evaluaciones realizaes deben tresformase en midíes concretes que protexan la salú del profesoráu, respeten la llibertá de cátedra y vuelvan el protagonismu a la comunidá educativa na vida de los centros. SUATEA reitera’l so compromisu cola defensa de los derechos del profesoráu de la enseñanza pública, y avisa que va tar sollerte con cualquier intentu d’imponer práctiques que vulneren l’autonomía docente, que comprometan’l bienestar de la comunidá educativa o qu’abran la puerta a la privatización.