SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
SUATEA esixe la dimisión de los responsables d’esta llaceria d’entamu de cursu escolar.
La Conseyería d’Educación índa nun se dignó asoleyar l’axudicación del profesoráu interín que mañana, según el so propiu calandariu, debería incorporase a los centros docentes asturianos.
Tres dos meses de despropósitos, erros y falta d’asumir responsabilidaes pol Conseyeru de turnu, avanzada la tardel del 31 d’agostu siguen ensin asoleyase les axudicaciones del profesoráu interín.
Sí hebo una rectificación parcial: tres la llaceria de la convocatoria de les places de los Conservatorios d’Asturies, la Conseyería cedió antes les presiones de les persones afectaes y d’organizaciones que como SUATEA llevamos denunciando les aberrantes actuaciones de la Conseyería d’Educación.
Los contratos de los docentes de los Conservatorios van ser prorrogaos hasta’l día 20 de setiembre, que ye cuando ta prevista la segunda axudicación d’interinos.
Alegrámonos de que la postura de SUATEA fuere atendida. Hai que recordar que fuimos l’únicu sindicatu presente na mañana del vienres pasáu acompañando al profesoráu nuna situación asemeyada.
Pero’l restu de miles d’interinos tán a la espera d’un axudicación que ta suponiendo una de les mayores vergoñes de la historia d’esta Conseyería. Pa ellos y elles la incrtidumbre vivida dende la convocatoria mantiénse y va medrando.
Erros nes oposiciones, un llistáu estraos de fallos, un calandariu aberrante y imposible de cumplir, una plafatorma informática tirada embaxo durante hores, un procesu de petición de places ensin incluyir les demandes de los centros, la imposibilidá d’acceder a la páxina de la Conseyería durante la mañana d’hoi,…
Son más de les cuatro de la tarde. Miles de docentes tán sofriendo una situación d’estrés derivada de la incompetencia de la conseyería.
Mañana van tener que presentase en Peñamellera Alta, en Degaña, en Somiedu, en Taramunde,… En toos estos conceyos asturianos mañana entama’l cursu al empar que n’Uviéu o en Xixón. Y los docentes tienen que tar ellí, da igual la hora a la que s’enteren del so destín nin de les hores de marxe que tenga pa organizase.
Esto tien que parar. El Conseyeru d’Educación tien que responder delantre de la sociedá asturiana y delantre de los docentes de la vergoña que tán suponiendo les actuaciones de la Conseyería.
SUATEA esixe respetu pal profesoráu del enseñu públicu asturianu y la dimisión de los responsables d’esta inmensa llaceria. Los partíos políticos deberíen ocupase tamién de lo que-yos socede a más d’una cuarta parte de los docentes asturianos y pidir esplicaciones na Xunta Xeneral.
SECRETARÍAU D’ASTURIES DE SUATEA
Esta entrada está disponible en: Castellano (Castellanu)
