Toos y toes trabayamos, toes y toos cobramos

Ta produciéndose nestes feches l’alderique y posterior votación pa la so aprobación del Proyeutu de Llei de Presupuestos Xenerales d’Asturies.  Nesti Proyeutu de Llei apaeció a última hora una partida de 4,8 millones “en previsión de la posible implantación de un nuevo Plan de Evaluación Docente, que llegado el caso podría ponerse en marcha tras el inicio del curso 2021-2022″ (TOMU VIII, páx. 11). La Conseyera d’Educación na comparecencia parllamentaria previa al alderique presupuestariu (10 d’avientu) anunciaba de sorpresa esta partida que nun apaecía nel borrador inicial.

Dende’l cursu pasáu, delles organizaciones sindicales vienen pidiendo poner a furrular un nuevu Plan d’Evaluación, refugáu dafechu por SUATEA. Esti pidimientu vieno acompañáu voces atronicaores qu’esixíen la dimisión de Carmen Suárez pola so xestión de la Conseyería d’Educación, siendo  especialmente critiques y belixerantes  na primer fola la pandemia. Pero, la providencia divina obró enantes del alderique los presupuestos y llegó la calma. El ruíu y la furia mediática tornáronse n’allabancies del maná provistu y estes organizaciones en cualificaes conseguidores- proveedores.

A lo llargo del tiempu y más na pandemia, el profesoráu vieno desenvolviendo’l so trabayu en condiciones difíciles, poniendo a disposición de la Conseyería d’Educación parte del so tiempu de descansu y de los sos recursos particulares pa garantizar el desenvolvimientu del so llabor docente (compra d’equipos informáticos y multimedia, gastos na meyora de la velocidá de les sos conexones privaes a Internet, formación acelerada en nueves estratexes didáctiques, metodolóxiques…). La reconocencia del trabayu eminentemente colectivu del conxuntu del profesoráu asturianu, según el so infrayable compromisu cola calidá de la Educación del nuesu alumnáu, ye despreciáu cuando s’apliquen los Planes d’Evaluación que remuneren selectivamente de mou individual.

Dedicar esta partida presupuestaria a implementar un nuevu Plan d’Evaluación que namás remuneraría a la metá del profesoráu  supondría xenerar nuevos estratos salariales ente’l profesoráu asturiano aumentando  les fiendes económiques actuales.  Camudar la forma de distribuir esos simbólicos  4,8 millones d’euros presupuestaos por aciu una medría llineal ya igual pa tol profesoráu señalaría la forma equitativa de consiguir la homologación salarial col restu de territorios. Ye menester recordar que la fienda que mos dixebra de la media salarial mensual estatal pa persones con menos de 5 años d’antigüedá ye d’unos 300 euros.

Por too ello, SUATEA propón a los partíos políticos asturianos la presentación d’una enmienda parcial a los Presupuestos: “…4,8 millones d’euros adicionales pa inxertar nes remuneraciones del personal docente non universitariu asturianu, dientro del conceutu Complementu Específicu Autonómicu, una medría llinial ya igual pa tol personal docente, independiente del cuerpu al que pertenezan y de la so antigüedá”.

El Secretariáu de SUATEA

N’Uviéu a 17 d’avientu de 2020