¿Tamos seguros?

Ayeri espardióse rápidamente una noticia preocupante: el seguru de responsabilidá civil que soscribió l’alministración pa la cobertoria de los centros educativos caducara en febreru del 2023. Namás enteranos d’ello, el sindicatu SUATEA averiguó y verificó la situación. Confirmóse que’l seguru de responsabilidá civil contratáu pola Conseyería yá nun ta vixente.

La propia Conseyería, unes hores más tarde, respóndía, n’educastur, con un comunicáu que, depués de mencionar los seguros existentes pa los edificios, y el seguru escolar que soscribe obligatoriamente l’alumnáu, acababa por reconocer qu’existió un seguru de responsabilidá civil, onde nun dexa clara la finalidá y onde en nengún momentu se diz de manera clara que caducara; puede entendese, eso sí, pol tiempu verbal utilizáu -“tenía” un seguru- que yá nun ta en vigor. Una vez pasáu, mui por alto, que nun había seguru ensin llegar a mencionalo y, menos tovía, ensin explicar les causes poles que yá nun ta contratao, inténtase calmar los ánimos diciendo que la Conseyería va cubrir responsablemente les consecuencies de lo que pudiera pasar. Pa evitar l’alarma, podía añadir: “anque yá nun haiga seguru, pero prefirió’l suspense hasta esta mañana, cuando, otra vez pa calmar los ánimos, les direcciones de los centros recibieron un corréu electrónicu firmáu pola Conseyería d’Educación, onde finalmente se reconoz abiertamente qu’el seguru de responsbalidá civil tuvo vixente hasta febreru del añu pasáu. D’entós p’acá, l’alministración asegura que va facese cargu de la cobertoria de cualesquier socesu.

Tou esti procesu plantea munches interrogantes: si’l seguru nun facía falta porque la Conseyería podía asumir el costo de los posibles socesos ¿Pa qué tábemos pagando un seguru? En casu contrariu, si’l seguru yera útil porque’l pagu de la cuota compensaba los gastos derivaos d’algún accidente ¿Por qué se rescindió’l cotratu? ¿O ye que simplemente caducó y nun se renovó por un error de l’Alministración? ¿Por qué nun conocemos, nin tán publicaos en nengún sitiu, los contratos y les cobertories? ¿Por qué tenemos qu’enteranos d’estes noticies pelos centros o la prensa? ¿Por qué, cuando la prensa publica que’l seguru caducó (reconocióse güei como cierto) y les centrales sindicales informen de la noticia al profesoráu, la Conseyería (la mesma Conseyería que sustituyó’l BOPA pola prensa) responde dando explicaciones poco riguroses? La Conseyería afirma, que, ensin esi seguru, l’Alministración ye responsable de posibles sucesos. Efectivamente ye asina porque la llei regúlalo. Pero, ensin un seguru específicu de responsabilidá civil ¿ta cubiertu l’alumnaú y la plantilla de trabayadores de l’Alministración educativa contra los daños que pueda haber nel exerciciu de les sos funciones? ¿Tamos seguros?

Ente esta dulda y la falta de claridá de la nuestra alministración, dende’l sindicatu SUATEA solicitemos a la Conseyería d’Educación: “se nos facilite, como representantes lexítimos de la enseñanza pública asturiana, copia del seguru o seguros que l’Alministración tenga contrataos y qu’afecten a la comunidá educativa, asina como el o los documentos onde  vengan referenciaes les responsabilidaes asumíes pola alministración al nun disponer, según se nos diz, d’un seguru específicu de responsabilidá civil.”

El Secretariáu del SUATEA

N’Uviéu a 25 de xineru de 2024