SUATEA tresllada a la Ministra la necesidá de la especialidá docente

Responsables de los STEs, de los que forma parte SUATEA, tuvieron una reunión esti miércoles nel Ministeriu d’Educación y Deportes cola nueva ministra, Milagros Tolón. 

Nel alcuentru, amás de treslladáse-y el malestar creciente de les y los docentes del estáu, incluyimos una cuestión qu’afecta d’una manera especial al profesoráu asturianu: la necesidá de la creación de les especialidaes d’Asturianu y Gallego-asturiano, una demanda histórica del SUATEA y del movimientu de reivindicación llingüística. En collaboración con ADAE (Asociación de Docentes d’Asturianu y Eonaviego/Gallego-asturiano), ficímos-y llegar a la nueva responsable del Ministeriu un informe exhaustivu nel que s’inclúi la base llegal necesaria p’algamar la especialidá docente.

Esta discriminación estructural, qu’afecta a más de 300 docentes, tien una solución que nun solo ye bien cenciella, sino que tamién ye llegalmente viable y nun supón nengún sobrescostu pal sistema públicu asturianu.

Dende’l SUATEA esiximos igualdá de derechos pal profesoráu d’Asturianu y Gallego-asturiano, de tal manera que puedan ser funcionaries y funcionarios de carrera a traviés d’un concursu-oposición, como pasa col restu d’especialidaes docentes, y que nun se-yos condene a la interinidá hasta la xubilación.