SUATEA-STEs impulsa iniciativa pola xubilación voluntaria a los 60

El Grupu Parllamentariu Plurinacional Sumar rexistró nel Congresu de los Diputaos una Proposición Non de Llei (PNL) a pidimientu de STES-Intersindical, de la que ye integrante SUATEA, onde se reclama la recuperación de la xubilación voluntaria del profesoráu a los 60 años pa tol personal docente.

Esta iniciativa parllamentaria ye frutu del trabayu sindical desarrolláu por STES-Intersindical y les sos organizaciones -ente elles SUATEA-, nos últimos meses col grupu parlamentariu Sumar pa treslladar la necesidá urxente de restablecer esti derechu históricu del profesoráu.

L’oficiu docente ta marcáu por un importante desgaste profesional, agraváu nos últimos años pol aumentu de ratios, la sobrecarga burocrática, la intensificación del trabayu nes aules y la falta de recursos abondos nel sistema educativu públicu. La recuperación de la xubilación voluntaria a los 60 años supondría reconocer esa realidá llaboral, garantizar una salida digna a la fin de la vida profesional y favorecer el necesariu relevu xeneracional na enseñanza pública.

Esta propuesta busca acabar coles desigualdaes esistentes ente’l profesoráu, derivaes de la coesistencia de distintos réximes de cotización qu’anguaño provoquen que docentes col mesmu trabayu tengan condiciones de xubilación distintes.

SUATEA va siguir trabayando pa qu’esta iniciativa se traduzca en midíes llexislatives efectives que dexen recuperar la xubilación voluntaria a los 60 años pa tol profesoráu. Esta midida forma parte de la llucha por dignificar les condiciones llaborales del profesoráu y el fortalecimientu de la educación pública.