SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
La otra selmana ordenóse’l desallugu de “La Madreña”. Dende SUATEA queremos manifestar el refugu total a esta decisión. Trátase, otra vuelta, de tarazar y esaniciar los sistemes organizativos alternativos al capitalismu onde primen la equidá, la llibertá d’espresión y l’autoxestión.
Pero La Madreña ye daqué más que too eso. Dende la so criación en 2011 hasta güei convirtióse nun auténticu referente de l’actividá política, social y cultural non solo n’Uviéu sinón n’Asturies entera.
La Madreña convirtióse nel puntu d’alcuentru d’una montonera de colectivos y movimientos sociales que mos aconceyamos nella davezu: 15M, Plataforma Feminista d’Asturies, les marees ciudadanes, el 22M, en definitiva ye’l llugar de reunión de tola xente qu’articulamos una oposición al neolliberalismu patriarcal impuestu dende les cúpules del poder.
Col tiempu les actividaes de La Madreña colos sos cuentacuentos, talleres de teatru o de defensa personal y los sos mercadinos cuayaron na ciudadanía d’a pie d’Uviéu. El pieslle de La Madreña supondría l’amputación d’un importante centru d’actividá social y dexaría ensin una amplia ufierta d’ociu a la ciudá. Prueba d’ello ye lo sostenío pol xuez instructor del casu, Francisco Javier Rodríguez Luengos, refugando’l desallugu porque, al so xuiciu, La Madreña taba usando un edificiu pal que nun hai un destinu claru con “fines sociales en porgüeyu de la comunidá”.
El desallugu de La Madreña será la execución d’un nuevu actu de represión escontra quien tenemos ellí el nuestru puntu d’alcuentru, debate y intercambiu d’idees pa llevantar un mundu más xustu.
¡NON AL DESALLLUGU DE LA MADREÑA!
¡ACUDE A LA MANIFESTACIÓN EL 21 DE MAYU A LES 20 H n’UVIÉU!
Secretariáu de SUATEA
Uviéu, 19 de mayu de 2014
Esta entrada está disponible en: Castellano (Castellanu)
