SUATEA reitera la esixencia d’acabar coles discriminaciones salariales nel profesoráu asturianu

Nueva reunión de la Mesa Sectorial d’Educación sobre’l Plan d’Evaluación

Na Mesa Sectorial d’Educación l’Alministración y el sindicatu afín a la mesma FETE-UGT – dada la nueva ausencia d’ANPE- siguieron emperraos en siguir cola operación de maquillaxe col enfotu en dexar preparada la modificación d’esta normativa que, recordemos, venceya’l salariu de los docentes a la evaluación realizada pol Director/a del centru educativu, de cara a les elecciones al parlamentu asturianu que tán al cayer.

Esta normativa, que desenvuelve la llamada Llei d’Evaluación, fae qu’un 40% del profesoráu tea discrimináu salarialmente. SUATEA llamentó nesti casu que l’Alministración siga arronchándose nesta llei pa caltener les diferencies salariales ente los docentes.

Lo más simpático del casu ye que les modificaciones qu’agora planteguen tienen la so desplicación nos manifiestos erros cometíos y na discriminación que truxo l’aplicación d’esta Llei d’Evaluación. Pa SUATEA, iguar estos erros foi posible durante tolos años d’aplicación. Sicasí, yera necesario voluntá política d’enmendar la plana a una política emprendida polos anteriores conseyeros José Luis Iglesias Riopedre y Ana Rosa Migoya, tiempu abondo tuvieron pa ello.

La discriminación ta na nos pegollos de la Llei d’Evaluación y los sos desenvolvimientos, asina como los agravios pal personal que vien d’otres CCAA nel concursu de tresllaos, pal que nun tenía cinco años d’antigüedá a la entrada en vigor de la llei y pal profesoráu interín. L’alministración vuelve aneciar: nin tien intención de reparar los agravios nin de modificar la llexislación p’acabar cola discriminación de colectivos enteros.

Como anécdota, l’alministración convocó dos díes enantes de les elecciones sindicales la Mesa Sectorial, una actuación ensin precedentes y con una clara intención: influyir nos resultaos electorales y favorecer a les organizaciones que nel so momentu respaldaron esta Llei y los sos desenvolvimientos. Agora lo qu’importa ye tener preparada esta modificación en viéspora de les elecciones de mayu a la Xunta Xeneral, según la mesma alministración nel mes d’abril pretenden que tea iguao.

SUATEA va siguir defendiendo la modificación del marcu llexislativu asturianu pa ser a algamar una homologación salarial rial pa tol profesoráu y una xuba salarial que compense la situación de furgón de cola del profesoráu asturianu respecto a la práctica totalidá de CCAA.

Y vamos siguir rechazando la LOMCE y los sos desenrollos, concretamente aquellos que dan a les direcciones de los centros la capacidá de decidir sobre los salarios y los destinos docentes. Por ello, reclamamos al gobiernu asturianu que nesta última etapa nun siga discriminando a los docentes asturianos y se valga d’esta oportunidá pa meyorar tanto les condiciones llaborales como les retributives del profesoráu.