SUATEA reclama cambeos na selección de direcciones

SUATEA reclama cambeos na selección de direcciones, incluyíes les de les escueles 0-3, y nes comisiones de serviciu de calter humanitariu

Güei pela mañana les organizaciones sindicales con representación na Mesa Sectorial d’Educación allegamos a Conseyería a tratar col equipu del Director Xeneral de Personal Docente aspeutos normativos sobre selección de direcciones, incluyíes les de les nueves escueles 0-3, y tamién sobre la convocatoria de comisiones de serviciu de calter humanitariu (por motivos de salú y conciliación de la vida familiar y llaboral).

Tocántenes a la futura convocatoria de concursu de méritos pa direcciones de centros y d’equipos d’orientación, la nuesa principal demanda ta rellacionada cola necesidá de los aspirantes de tener un mínimu d’esperiencia como funcionarios de carrera. Por ello, pidimos que na norma s’esaniciese’l requisitu de  d’esperiencia solo como funcionariáu  “de carrera” y se tuviere en cuenta tamién la  esperiencia docente como profesoráu interín, n’aplicación de la directiva europea 1999/70/CE.

Sobre les direcciones de les escueles 0-3 de nueva creación, de primeres, confirmáronnos les cifres yá incluyíes nos Presupuestos, polo que van salir 17 places de dirección pa 31 escueles de nueva apertura. Inclúyense equí les 16 de construcción municipal al pie de les 15 que se van abrir n’espacios yá esistentes. La nuesa principal aportación refirióse a los criterios que s’establecen pa que ciertes escueles compartan dirección y otres non, y creemos necesario que se revisen ciertos casos, como’l de les futures escueles de Les Arriondes (Parres) y Caravia. Nun paez de recibu que, teniendo la escuela de Les Arriondes trés unidaes, que ye’l númberu mínimu establecíu na normativa presentada güei pa poder tener dirección única, la persona responsable de la mesma tenga que movese hasta Caravia (1 unidá), cuando esta postrera podría tener dirección única de forma escepcional, como se prevé n’otros casos.

Tamién mos esmolez la posibilidá de que queden escueles de nueva apertura ensin naide que quiera asumir la dirección y se pueda designar pol avezáu “deazu” d’Inspección, como yá pasa n’otros centros. La diferencia nesti casu ye que, de resultar (des)engraciaos cola designación, les y los candidatos podríen tener que movese nuna mesma selmana, si non nun mesmu día, ente Grandas de Salime, Santalla d’Ozcos y La Puela (Ayande), por casu.

A lo último, en relación a la futura publicación de la convocatoria de comisiones de serviciu por  conciliación de la vida familiar y llaboral, apuntemos que nos paez erróneu’l criteriu únicu pol cual debe d’haber mínimo de 70 kilómetros de distancia ente’l centru de trabayu y la casa habitual. Daes les característiques xeográfiques del nuesu país, creemos meyor añedir un criteriu de tiempu tamién, por casu, que ronde los 40 minutos. Rescampla qu’hai bien de zones de Asturies, y sobremanera nel occidente, nes que ye fácil emplegar 40 minutos en realizar trayectos en coche que nun superen los 30 kilómetros, cuando en percorrer esa mesma distancia pola A-8 nun s’invierte nin la metá de tiempu.