SUATEA y la solidaridá internacionalista

La pasada selmana, el sindicatu SUATEA fixo pública la presentación de la so propuesta al Conceyu de Xixón. Mientres l’últimu añu, tanto SUATEA como la Confederación Intersindical (CI) de la que forma parte’l sindicatu asturianu, vinieron collaborando nel impulsu pa la creación de la Guardia Indíxena Oromia (formigues en llingua embera) destinada a garantizar la protección del mediu natural nel qu’esta comunidá desenvuelve la so vida na rexón selvática del Darién, na frontera ente Colombia y Panamá. Nesta ocasión, queremos animar al desenvolvimientu de les actividaes del grupu de muyeres de la mesma comunidá que xueguen un papel importante n’ámbitos tan significativos como la tresmisión de la cultura ancestral o nel impulsu d’actuaciones pa poner fin a determinaes acciones delictives que realicen nos sos territorios grupos ayenos a la comunidá.
Pa desenvolver esti trabayu foi fundamental l’intercambiu d’informaciones, alderiques y propuestes surdíos alredor del grupu d’acuyida temporal de colombianes qu’opera en Xixón dende hai más de venti años. Dende SUATEA vamos siguir calteniendo’l compromisu asumíu va años d’hermanamientu solidariu coles distintes lluches populares en Colombia. Entendemos l’internacionalismu como una xera dientro de les diverses actividaes que desenvolvemos como sindicatu asambleariu, alternativu y de clas.

Enllaz a la petición de SUATEA.