SUATEA, pola recuperación de la calidá nel sistema educativu asturianu

SUATEA pide la recuperación de la calidá nel sistema educativu

Nestos momentos, dende l’Alministración, tán plantegando midíes pa la recuperación de los derechos que los emplegaos públicos perdieron pola mor de los retayos. De toles maneres, nel sector docente, afectáu como’l que más, nun mos vamos beneficiar de nenguna d’estes midíes, porque dizque nun van ser d’aplicación nel sector educativu.
Queremos recorda-y a l’Alministración que’l profesoráu asturianu sufrió unos retayos que traxeron un empeoramientu de les condiciones llaborales: baxada y depués conxelación del salariu, penalización económica en casu de baxa médica, aumentu d’horarios, aules masificaes, menos personal, eliminación de midíes d’atención a la diversidá, non sustitución hasta pasaos 15 díes del profesoráu de baxa médica sobrecargando al restu, etc.
Anque estes midíes vienen del gobiernu central, equí tenemos un gobiernu autonómicu que munches veces fai la interpretación más restrictiva de la norma. Como exemplu d’esto, podemos dicir que l’Alministración Autonómica fai l’incrementu del horariu llectivu más perxudicial deriváu del Real Decretu-llei 14/2012, de 20 d’abril, de midíes urxentes de racionalización del gastu públicu nel ámbitu educativu de tol Estáu.
Como consecuencia d’ello, el profesoráu de Cuerpos de Secundaria d’Asturies tien la mayor carga horaria de tol Estáu, tal como reflexamos nestes tables:

Apocayá, SUATEA presentó al Conseyeru d’Educación d’Asturies esti estudiu que compara la situación del profesoráu asturiano cola del restu del estáu, amás d’otru sobre la edá media del profesoráu asturianu y la so distribución por conceyos. El panorama que presentamos ye alarmante, porque tenemos una plantiya de profesoraáu avieyáu y coles peores condiciones llaborales del Estáu. El profesoráu asturianu de los Cuerpos de Secundaria tien una xornada de 37,5 hores selmanales, 29 d’elles son de permanencia obligada nel centru y solamente 1 hora más, que nun ye abondo, que se computa por asistencia a claustros, evaluaciones, reuniones de equipos docentes, etc. Les 7,5 hores de trabayu fuera del centru dedíquense a preparar clases y materiales, correxir exámenes, correxir llibretes, formación permanente, etc. Si la situación del profesoráu de Secundaria ye mui llaceriosa, la del profesoráu del Cuerpu de Maestros nun ye meyor y soporta tamién una carga horaria mui gravosa.
Otres CCAA disfruten yá de meyores condiciones llaborales, como ye’l casu del País Vascu, Galicia y dientro poco Baleares, onde se firmó un Alcuerdu pa reducir pasu ente pasu l’horariu llectivu. Poro, los docentes asturianos esiximos que l’ Alministración escuche les reivindicaciones del sector educativo, que necesita urxentemente la meyora de les sos condiciones llaborales, entamando pela reducción de horariu llectivu y complementariu, que va valir ensin duda p’atender al alumnáu de manera más curiosa y nun mayor númberu de docentes.
Por eso, énte la próxima apertura de negociaciones dientro de la Mesa Sectorial, SUATEA esixe qu’ésti seya un tema central porque ye una de les mayores preocupaciones del profesoráu nesti momentu. La nuestra propuesta no tocante a los horarios refléxase d’esta manera.

Desde SUATEA, demandamos la reducción de 3 hores llectives selmanales pa tolos docentes asturianos. Reivindicamos más tiempu pa facer trabayos propios del aula y tutoría (revisión y siguimientu de programaciones, preparación d’actividades, llaboratorios, práctiques, talleres y esperiencias, emplegu de TICS, planes d’aición tutorial…), asina como horariu nel centru pa preparar y organizar los materiales y les actividaes, cuntando con tolos recursos técnicos que se tienen ende (pizarra dixital interactiva, miniordenadores portátiles, aules d’informática, fotocopiadores, encuadernadores, plastificadores … ). Esti tiempu va valir p’atender les necesidaes cada vez mayores de sofitu educativu y del enseñu individualizáu. La reducción del horariu llectivu quíta-y al profesoráu de parte del estrés diariu que xenera la docencia, favoreciendo entós el rendimientu.

Uviéu, 16 de ochobre de 2015
El Secretariáu de Asturies de SUATEA