SUATEA pidi a les direcciones de los centros que denuncien les factures falses

SUATEA va dirisixe a la Conseyería d’Educación pa pidir esplicaciones pola comunicación sobre la verificación de dellos suministros nos centros educativos.

A finales del postreru mes de xunu, la Conseyería d’Educación dirixóse a les direcciones d’un bon garrapiellu de centros educativos pa solicita-yos que ratificaren si dellos suministros y equipamientos se recibieren realmente. La Conseyería facilitaba un númberu de teléfono pa cualisquier aclaración al respective d’esta petición. Munchos centros educativos nun fueron quien a que naide respondiere nesi númberu de teléfono.

Remitiéronse a los centros en dellos casos un cientu de factures acompañaes d’un formulariu pa preguntar a los equipos directivos si efectivamente se recibiere’l suministru facturáu. Choca lo desorbitao de dellos de los precios nos equipamientos facturaos, o la inexistencia d’aules modelo o cocines completes que supuestamente estos centros recibieren.

En nengún momentu nin a la Xunta de Personal Docente nin a los sindicatos educativos se-yos informó sobre esti procesu nin se fexo nenguna declaración pública por parte de la Conseyería p’aclariar l’unvíu fechu nun momentu nel que los centros tán inmersos nos procesos de matrícula y d’aplicación, llamentablemente, de los nuevos currícula LOMCE.

Ye por ello que SUATEA, va dirixise a la Conceyería d’Educación pa esixir aclaraciones sobre les implicaciones del unvíu fechu y pa conocer l’alcance de les cuestiones que se-yos remitieron a los centros, que como se desprende de lo mandao, pueden contener factures nes que ye posibe que se tenga falsificao tanto la firma del director/a como la d’otros integrantes del claustru asina como’l sellu del centru.

SUATEA yá se dirixó’l 30 de xunu a los centros educativos con textu que s’adxunta p’alertar a les direcciones sobre la situación que se podría dar y encamentar la presentación de la correspondiente denuncia de lo socedío en cualisquier de les dependencies oficiales competentes pa la so recepción (guardia civil, policía nacional, fiscalía o xulgáu d’instrucción de guardia) en casu de detectar falsedá nestos documentos.

Estimáu director/a:

Dende delles direcciones de centros educativos infórmennos de que se ta recibiendo una petición por parte de la Conseyería pa que se proceda a la verificación de la prestación de dellos sumistros nos centros educativos y respuendan sobre ello nun plazu de 7 díes.

Esta petición nun tendría especial trescendencia si nun fuera porque, tal paez, puede existir dalgún casu en que los suministros y/o prestaciones que se deben verificar nun se recibieron realmente nel centru y, amás, na documentación recibida de la Conseyería, pa efectuar la comprobación ordenada por ésta, inclúyense factures nes que ye posible que se falsificare tanto la firma del director/a como’l sellu del centru. De ser asina, taríemos en presencia de fechos constitutivos de delitu. Polo tanto, aconseyamos la minuciosa verificación y revisión de la documentación recibida, y, en casu d’apreciar la existencia de dalguna falsificación de firmes o sellos, amás de comunicalo a la Conseyería, se formule la correspondiente denuncia en cualisquier de les dependencies oficiales competentes pa la so recepción (guardia civil, policía nacional, fiscalía o xuzgáu d’instrucción de guardia).

Secretariáu d’Asturies de SUATEA
Uviéu, 3 de xunetu del 2015