SUATEA opónse a una plantiya dafechu insuficiente

Cola plantiya propuesta nun s’atiende nin al 70 % de les necesidaes reales

Güei día 25 de febreru celebróse la última mesa de negociación de plantiyes orgániques ente la Conseyería Educación y les organizaciones sindicales. SUATEA refugó esta propuesta porque la cifra total de puestos docentes caltiense prácticamente igual que n’años anteriores – al rodiu los 9.800 –, lo que resulta a les clares insuficiente porque: 

• Nun dexa dar respuesta a les necesidaes reales del nuesu sistema educativu con personal estable; necesidaes que tendrán de ser cubiertes, una vegada más, con una cantidá grande de personal interino: 4.000 aprosimao, más del 30% de la plantiya. Con estes cifres rescampla que más allá de les sustituciones temporales que puedan precisase esisten places de calter estructural ocupaes por personal interino que tendríen de formar parte de la plantiya dende va años. Ye hora de determinar cuántos puestos docentes son, efectivamente, estructurales y desquitar al personal por esti abusu de temporalidá cometíu poles Alministraciones Públiques.
• Caltién la delda pendiente cola inclusión, que vien retrasándose dende 2007 (Ratificación de la Convención sobro los derechos de les persones con discapacidá, BOE 21 d’abril de 2008), magar del plazu llegalmente establecíu pal so cumplimientu, tanto na Axenda 2030 pal Desenvolvimientu Sostenible, como na LOMLOE. Nesti sentíu, nun se creen abondes places que dexen la baxada de ratios y/o la docencia compartida necesaria pa personalizar la enseñanza y dar cumplimientu a un oxetivu de tal caláu. Tampoco hai una medría significativa de puestos nes especialidaes d’orientación -nun se preven puestos nos CIFP-, PTSC, AL y PT. A pesar de qu’esti personal, según les instrucciones pa los SEO publicaes nos años 2018 y 2019 -non yá nes de 2020- tien d’encargase de l’alfabetización ética de la comunidá educativa, l’asesoramientu a los centros dende l’enfoque inclusivu al envís de facilitar la coordinación y la flexibilidá na organización d’espacios, tiempos y recursos, y de la planificación de la enseñanza pa toes y toos teniendo como referencia’l marcu del Diseñu Universal pal Aprendizaxe. Oxetivos inalcanzables mientres la planificación de la plantiya respuenda a les instrucciones impuestes pola circular d’entamu de cursu, en llugar d’a unos criterios fayadizos fitos por Decretu. Precisamente, esta ausencia de normativa autonómica que regule l’atención educativa dende’l paradigma inclusivu ye lo que dexa a la Conseyería d’Educación arromendar puntualmente la situación por aciu esa cosa denominada necesidaes autorizaes de profesoráu.
• La plantiya d’Educación Infantil sigui mermando. Esto supón, en gran midida, la perda de los sofitos que son fundamentales nesta etapa. Sofitos que, n’ocasiones, resuélvense con profesoráu d’otra especialidá. Nun puede ser qu’esta etapa sía considerada la pilastra del sistema educativu, y que nun se faiga un esfuerzu p’apostar por una ufierta pública amplia que garantice l’atención personalizada baxando les ratios, amás de la integración de toa esta etapa na Conseyería d’Educación pa consiguir  la universalidá y gratuidá dende’l primer ciclu, en llugar d’esleir la inversión subvencionando unidaes en centros privaos.
• Nun contempla la intención d’aplicar al Cuerpu de Maestres l’encamientu d’una xornada lectiva máxima de 23 hores lectives, establecida pola Llei 4/2019, de 7 de marzu, en cuantes que les 4.373 places previstes nun dexen amenorgar la hores de docencia directa, perpetuando asina les diferencies nes condiciones llaborales -tanto na distribución del horariu llaboral, como nel aspeutu retributivu- ente los distintos cuerpos d’enseñanza. 
• Nun inclúi puestos de Llingua Asturiana y Gallego-Asturianu, nin se fai nenguna previsión o estudiu pa cursos vinientes, tres años de reivindicación de puestos pa estes especialidaes.
• Príndase a les organizaciones sindicales la capacidá de negociación real de la plantiya al emplegar una plantiya illegal de “necesidaes” temporales (más del 30%)  que va camín d’equiparase a la única llegalmente reconocida: la orgánica.

Dende SUATEA consideramos l’actual propuesta de plantiyes claramente insuficiente pa dotar al sistema d’educación públicu de la cantidá de docentes necesarios pa llevar a cabu toles funciones que-yos son atribuyíes col rigor y la calidá que rique una sociedá avanzada, y respetando unes condiciones llaborales dignes del profesoráu. Nesti sentíu, nun podemos sinón repitir la esixencia de qu’esta Conseyería se comprometa a cumplir col Alcuerdu de Plantiyes, en base a los argumentos enantes espuestos y sobro los que venimos aportunando añu tres d’añu. Si una vegada más l’Alministración decide establecer estes irregulares y pírriques plantiyes, dende SUATEA nun nos queda más remediu qu’oponenos a elles. 

El Secretariáu de SUATEA

 N’Uviéu, a 25 de febreru de 2021