SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
El sindicatu educativu SUATEA recuérda-y a Javier Fernández que ye necesariu un cambiu nes formes y nel conteníu de les polítiques educatives que desenvolvió’l so gobiernu na última llexislatura, si quier mantener un sistema educativu públicu de calidá y al serviciu de les necesidaes de la sociedá asturiana.
Esta última llexislatura a manes del gobiernu de la FSA-PSOE tuvo marcada pol escándalu del casu Marea qu’afectaba a l’anterior alministración. Nun se supo, o nun se quiso, aparar nel camín esbrozáu al desastre, a la desorganización, al cortoplacismu y a la improvisación que lleva reinando na Conseyería durante más llexislatures de les deseables pa la bona salú del sistema educativu asturianu.
El gobiernu de Javier Fernández tien per delantre 4 años, si acaba la llexislatura, p’aparar, dar marcha atrás y reconducir les más de les polítiques que se desenvolvieron na Conseyería d’Educación de la mano d’Ana González.
Nes últimes selmanes tamos viendo espeyase’l desastre de la Ufierta Pública d’Emplegu, consecuencia directa d’un Alcuerdu d’Interinos que ye necesario y imprescindible derogar, y al tiempu sentase na mesa col conxuntu de les organizaciones sindicales a negociar un alcuerdu xustu y equitativu frutu del consensu y non de la imposición como ye l’actual.
Los docentes del sistema educativu públicu asturianu llevamos sofriendo ataques por parte de l’alministración durante toos estos años, sacando alantre trabayu en condiciones que nun son les meyores y garantizando un nivel de calidá gracies principalmente al bon desempeñu profesional del conxuntu del profesoráu, ensin que per parte de quien gobierna heba’l más mínimu xestu en dignificar la profesión.
Hai 3 años la Conseyera d’Educación, Ana González, comprometióse a qu’enantes d’acabar la llexislatura los docentes de Llingua asturiana diben ver reconocida la so llabor cola creación de la Especialidá. Depués d’esti tiempu siguimos esperando que se cumpla con esa demanda d’esti colectivu y d’esti sindicatu. Tres años nos que la Conseyería y el Ministeriu lo único que ficieron foi enredase nel tuya-mía. Si hubiere intención rial de dignificar l’area de llingua asturiana la Conseyería tien toles ferramientes, tal y cómo-y vienen recordando dende’l Ministeriu, necesaries pa crear la especialidá.
Esta última llexislatura tuvo marcada por recorte nes plantiyes docentes, la Conseyería dotó a los centros educativos del mínimu imprescindible de profesionales pal so funcionamientu. Esta política espeyóse nun aumentu significativu de les medies xornaes col envís d’ocultar estos recortes nes plantiyes de los centros a la opinión pública. Les sos consecuencies son una cada vez más mermada posibilidá d’atender a la diversidá y a les necesidaes educatives especiales, dexando d’atender a principios básicos de la educación como son la equidá y la inclusión.
Esperamos que por fin, dende la Conseyería que se constituya, se pongan les midíes necesaries pa menguar les mancadures que la LOMCE ta faciendo nel Sistema Educativu Públicu Asturianu. Hasta agora la única política que se fexo d’oposición a esta denostada llei foi dicir al altu la lleva que mala yera, pa llueu a les agachaes aplicala como bonos alumnos aventayaos de les polítiques neolliberales qu’emanen del Ministeriu.
Uviéu, 23 de xunetu de 2015
Esta entrada está disponible en: Castellano (Castellanu)
