SUATEA esixe a l’alministración la retirada del borrador d’alcuerdu sobre ellaboración de llistes d’interinos.

Na Mesa Sectorial d’Educación celebrada güei xueves 13 de marzu, l’Alministración pretendió xustificar lo inxustificable: aprecien enforma’l llabor del profesoráu interín, pero tán dispuestos a despidir masivamente a esti colectivu.

En dicha mesa, les propuestes de SUATEA fueron la retirada del borrador propuestu pola Alministración y la defensa de la estabilidá de les llistes de profesoráu interín en Asturies . SUATEA reprochó a la Conseyería d’Educación que per una parte recurra la LOMCE y, por otra, aplique polítiques como les promovies por Wert y Rajoy.  Son los dos cares d’una Conseyería que sigue destruyendo empléu públicu -vease la desautorización de la política de plantiyes y unidaes que la Xunta Xeneral de Principáu aprobó nel so plenu de principios de marzu-, esanicia unidaes y puestos de trabayu y agora pretende que sían los docentes interinos la siguiente víctima de la so política de retayos.
SUATEA plantegó que se retirara la convocatoria d’oposiciones pa esti cursu, pos la razón principal de dicha convocatoria ye la de camudar el sistema d’ellaboración de llistes d’interinos/as pa espulsar d’elles a les persones que pola so esperiencia cobren trienios y sexenios. Alieguen que pretenden ufiertar trabayu a los mozos que se formaron pa la docencia, anque para ello tengan que despidir a miles d’interinos con años d’esperiencia y con bones resultancies nes oposiciones.
Tamién plantegamos la defensa a estazón de la estabilidá de les llistes de profesoráu interín a semeyanza de lo qu’asocede en munches CCAA. Esta estabilidá ye beneficiosa pa tol sistema educativu, y reconocería de fechu l’importante llabor que’l profesoráu interín ( ¡una cuarta parte de la plantiya total de docentes en Asturies¡) lleva desempeñando.
SUATEA denunció la hipocresía del gobiernu asturianu que diz defender a el trabayadores de la industria asturiano –plantegando por casu que, si produz el zarru d’empreses en Asturies, nun se consuman productos d’esa empresa na nuesa Comunidá- de la que se niega a defender a quien trabayen y tán nes actuales llistes de profesoráu interín.
El so despreciu escontra el trabayadores de la enseñanza de Asturies paez nun tener llendes. Desmantélense les plantiyes docentes na escuela pública ensin negociación colos sindicatos, niéguense a atender les legitimes reivindicaciones de los centros públicos que tan movilizándose y van siguir nestos próximos díes, esaníciense unidaes nos centros públicos mientres se caltienen los conciertos colos centros privaos. Y agora pretende acabase con una parte del profesoráu qu’en munchos casos lleva emprestando los sos servicios dende va años.
Esta propuesta, qu’agora se destinaría al profesoráu de les especialidaes de FP y Secundaria que pretenden convocase anguaño, sería d’aplicación pa tol profesoráu qu’agora ta nes llistes.
L’Asamblea de profesoráu interín convocada por SUATEA propunxo la retirada del borrador propuestu pola Alministración y la realización de movilizaciones que van tener llugar si la Conseyería sigue empeñada n’aplicar una regulación de les llistes que va dexar nel paru a miles d’interinos. La selmana próxima va tener llugar una nueva xunta de la Mesa Sectorial. SUATEA ta llevando una campaña informativa pa sollertar a tol profesoráu interín sobre les graves implicaciones d’esta propuesta