SUATEA énte’l chantaxe de les aseguradores privaes

SUATEA énte’l chantaxe de les aseguradores privaes: too pola sanidá pública, too pa la sanidá pública 

Cerca de 1.5 millones de funcionaries y funcionarios mutualistes de MUFACE –cifra qu’inclúi a personal tanto n’activu como xubilao y a los sos familiares– tán viendo con esmolición la negociación del nuevu conciertu de MUFACE coles aseguradores sanitaries privaes pal periodu 2025-2026. Ello ye consecuencia de la non presentación a la llicitación convocada pola mutua de les empreses qu’hasta’l momentu emprestaben el serviciu d’atención sanitaria a los y les mutualistes qu’asina lo escoyíen: Adeslas, Asisa y DKV. Argumenten que l’últimu conciertu supúnxo-yos perdes económiques por valor de 600 millones d’euros, y, anque’l Gobiernu apautó un aumentu del 17% sobre la sovención añal recibida nel conciertu anterior, reclamen una meyora del 40% nesa dotación económica.

Les aseguradores privaes, ensin dulda conocedores de la situación complicada que traviesa la sanidá pública por falta d’inversión, tán sometiendo al Gobiernu central a un fuerte chantaxe al nun presentase a la llicitación. Tamién son conscientes del problema que xeneraríen a la sanidá pública si ésta tuviera qu’asumir de sutrucu al más del 60% de los/les mutualistes de MUFACE que tán siendo atendíos poles privaes anguaño, y aprovéchenlo na negociación. Con esta acción nun busquen ameyorar la so cada vez peor asistencia sanitaria, sinón que pretenden aumentar los sos marxes de beneficiu a cuenta de les y los contribuyentes.

Dende SUATEA denunciamos esti chantaxe al que les aseguradores tán sometiendo al Gobiernu, nel qu’amás utilicen como rehenes a miles de mutualistes. Tanto elles y ellos como’l restu de personal  al cargu d’Educación (interinaxe, llaborales…) saben perfectamente que la calidá de la prestación sanitaria y el compromisu verdaderu cola salú de la mayoría social solo los ufierta la sanidá pública. 

El nuesu compromisu cola educación pública faise estensible al restu de servicios públicos. Por ello, consideramos que l’Estáu tien d’acabar col modelu de financión de les empreses privaes al traviés de los conciertos, que refugamos tanto n’educación como en sanidá. Los recursos económicos del estáu son llindaos, y tou esvíu de fondos públicos a les empreses privaes va dir siempres nel so desterciu, a lo que nos oponemos dafechu. 

Coherentemente, apostamos por un modelu de sanidá pública universal, gratuita y de calidá en condiciones d’igualdá pa tola sociedá. Énte a cada intentu d’ataque a los servicios públicos, van tenenos siempres enfrente. Too pola sanidá pública, too pa la sanidá pública.