SUATEA énte los presupuestos asturianos pa 2023

Los voceros del Gobiernu califiquen los presupuestos pa 2023 d’espansivos “con una crecedera del 11,4% al respective de les cuentes vixentes d’anguaño”. Trátase, según estes mesmes fontes de “sofitar a la clase media y trabayadora, fortaleciendo l’estáu del bientar”.

Sofítense estes cifres en “l’emburrie que facilita la llegada de los fondos europeos provenientes del Mecanismu de Recuperación y Resiliencia”. Dende SUATEA, allegrámonos de too ello anque, la verdá ye que vemos los datos como decepcionantes cuidao que los mesmos nun dan respuesta a delles de les reivindicaciones históriques que dende’l movimientu sindical venimos plantegando dende hai yá demasiaos años.

Anúnciasenos “l’oxetivu d’impulsar nueves infraestructures, como los institutos uvieinos de La Florida y La Corredoria o’l Rei Pelayo, de Cangues d’Onís”, obres que se vienen reclamando dende antes de la llegada de la pandemia.

Nestos momentos, el procesu escontra la gratuidá y l’ufierta universal del ciclu 0-3 años ta abiertu, emburriáu pola llei educativa vixente. Sicasí, la realidá amuésanos qu’inda falta enforma camín pa consiguir esi oxetivu y que la creación de places abondes de 0-3 años ye una asignatura pendiente.

Escontra la gratuidá avánzase amodo nestos presupuestos, que según la Conseyería d’Educación van dexar la gratuidá de la etapa pa un 75 % de les families (aquelles con ingresos añales menores de 42.000€). Sicasí, esta midida solo va afectar territorialmente a 48 conceyos de los 78  que tien Asturies y porcentualmente al 21% aprosimao de la población de 0-3 años  que ta escolarizada (estimación  a partir de datos del cursu 2019/2020), bien llueñe de la universalización de la ufierta.

Queda, poro, enforma camín que percorrer presupuestariamente pa llograr l’oxetivu marcáu pola LOMLOE  de la gratuidá y universalización. Amás, dende SUATEA proponemos qu’esti oxetivu tendría de complementase:  

• Col derechu de toles families asturianes de poder aportar a una plaza d’educación 0-3 años pública, gratuita, xestionada pola alministración competente en materia educativo.
• Cola progresiva creación de centros específicos d’educación infantil (de primer y segundu ciclu) que dean unidá pedagóxica a la etapa y que sían centros fayadizos al alumnáu que tienen d’acoyer y de dimensiones humanes y razonables.
• Cola progresiva unificación y dignificación de condiciones llaborales, lo mesmo que de titulaciones, pa exercer como personal educativo na etapa d’infantil, tanto nel primer ciclu como nel segundu ciclu,  con cuenta d’evitar categoríes y funciones estremaes que xeneren tensiones llaborales nada convenientes nuna etapa educativa tan sensible.
• Cola consideración de personal docente, pa toles persones trabayadores de la etapa d’Educación Infantil. 

P’algamar esti oxetivu va ser necesaria una medría presupuestaria fuerte. Dende SUATEA tenemos qu’aportunar en que los recursos económicos esisten. Solo ye cuestión d’invertir el dineru público nel sector públicu.

De la mesma, sería importante garantizar que tolos colexos públicos cunten con comedores escolares dende setiembre a xunu incluyíos, nos que s’ufierte esi réxime alimentariu saludable que nos cita’l preámbulu de la LOMLOE. Una reivindicación sentida por tola comunidá educativa Llamentamos dende SUATEA que la llegada de los fondos europeos nun vaigan dexar algamar reclamaciones tan necesaries como ye l’amenorgamientu a 23 hores lectives pal personal docente de Primaria o Infantil pa lo que según les nueses estimaciones sería necesariu una medría averada de 422 places, lo que supondría una partida de 12.900.000 €

Tampoco vamos llegar con estos presupuestos a ver el cumplimientu d’una sentida necesidá como ye l’amenorgamientu horariu pal profesoráu mayor de 55 años, daqué que, magar tar reconocíu por llei, el Principáu nunca s’amosó dispuestu a axustar. Echamos en falta una partida qu’incluya una medría de 402 places, que se sufragaríen con una partida adicional de 13 millones de € que dexaría algamar esa aspiración.

A lo último, queremos denunciar una vegada más, l’arbitrariedá que supón el caltenimientu del actual sistema d’incentivu d’Evaluación Docente del que venimos diciendo que tien un calter claramente discriminatoriu con efectos importantes como l’apaición d’hasta cinco categoríes retributives estremaes por realizar el mesmu trabayu. Queremos denunciar que’l caltenimientu d’esta opción obedez, ente otros aspeutos, a intereses económicos que s’escuenden.

Frente al complementu autonómicu que s’enllantó nel restu de comunidaes, Asturies optó por esti sistema d’incentivu d’evaluación docente. La opción de la homologación que defendemos dende SUATEA implicaría un complementu igual pal conxuntu del profesoráu, con una plantiya de 12 000 persones según el censu de les recientes elecciones sindicales.

Esto supondría una cantidá que calculamos en redol a 53,5 millones de €. Frente a ello, nos presupuestos presentaos a alderique, atopamos con una partida que se queda en 36,2 millones d’euros. La diferencia aproximado de 17 millones ye’l datu que falta nestos presupuestos. Trátase de la cantidá que l’Alministración arrampuña al conxuntu de docentes de la nuesa comunidá.

El Secretariáu de SUATEA

Uviéu 23 de payares de 2023