SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
La selmana pasada, el refalfiu del profesoráu asturiano algamaba un puntu álxidu por mor de la incongruencia d’un Ministeriu y d’una Conseyería d’Educación qu’aporfien n’imponer un calendariu d’aplicación de la LLOMLLOE magar tolos problemes que xenera, ensin ufrir meyora dala que suponga la fin del abandonu de la escuela pública tres sufrir más d’una década de retayos brutales. Hai aspeutos que se reclamen de forma unánime como: plazos de tiempu razonables pa la reflexón, pa la coordinación y pa la formación del profesoráu que requier una nueva llei educativa; una propuesta consensuada pa reducir la sobrecarga burocrática que dificulta, cada vuelta más, el desempeñu de la función docente; un amenorgamientu de la ratio d’alumnáu per aula, cola ampliación consecuente nes plantiyes; la reducción de la xornada lectiva; la meyora de l’atención educativa, etc.
La primer reaición de dalguna organización sindical foi tirase a la convocatoria de movilizaciones en solitario, nun faciendo casu nengún al profesoráu, que demandaba aiciones unitaries y contundentes.
En SUATEA presentábasemos un dilema: ellaborar un calendariu propiu d’aiciones o buscar una fórmula unitaria pa garantizar que la movilización fore exitosa. Fiel a la nuesa tradición política, llamemos al restu d’organizaciones sindicales pa valorar la necesidá d’actuar al unísonu porque tábemos delantre d’una reivindicación de calter tresversal ente’l profesoráu. La bona disposición del restu de sindicatos permitió que la movilización se formulara finalmente como una reclamación unitaria qu’obligó a la Consejería a mover ficha darréu. SUATEA foi clave y actuó de forma responsable al buscar la unidá sindical pa un problema de fondura qu’afeuta al enseñu públicu y al profesoráu.
Esta mesma llinia d’actuación caracterizó SUATEA en tola so trayectoria que se remonta a más de cuarenta años de llucha. Convién recordar aquí que SUATEA presidió la Xunta de Personal Docente dolce años consecutivos (2006-2018) y que foron años d’una actividá importante nos que se llevaron alantre reivindicaciones conxuntes y nos que se llograron múltiples alcuerdos cola Alministración. Esti postrer mandatu (2018-2022), sicasí, nel que SUATEA nun exerció la presidencia nin la secretaría, la Xunta de Personal caracterizóse pola inoperancia y pola inaición más absolutes. Entá más, la parálisis de la Xunta de Personal impidió tener un papel activu nun periodu clave, como foi l’impactu de la pandemia nel sector de la Educación. Y lo mesmo ocurrió cola implantación de la LLOMLLOE, tema de profundidá pal que nunca fomos convocaos y al que la Xunta de Personal nun dedicó nin un únicu debate.
Pero’l sindicatu SUATEA ye útil y fai falta n’otres munches estayes. Ensin dir más p’allá, diba ser imposible imaxinar l’actual procesu d’estabilización del personal interín ensin la intervención de SUATEA y el conxuntu de los STEs a nivel estatal. Vaya per delantre que tamos ante un procesu que nun ye’l que’l nuesu sindicatu formulaba, yá que siempres defendimos qu’hai qu’estabilizar les persones y non les places. Otra manera, magar les munches deficiencies y magar la escasez de places en delles CCAA (Asturies ente elles), varios millares de compañeros y de compañeres van ver cómo la so situación llaboral sal de la precariedá pa estabilizase magar too ello. Si miramos p’atrás, SUATEA plantegó dende’l comienzu qu’había que xugar la carta de buscar sofitos políticos, y fixímoslo asina, y la de presentar demandes xudiciales de xeitu simultaneu. Frente a esto, otros apostaron namás pola vía xudicial, ufriendo a dellos despachos d’abogaos grandes beneficios que pretendíen sufragar al traviés de campañes nes redes sociales.
La propuesta d’abrir espacios unitarios de movilización llevómos a una convocatoria de fuelga estatal promovida por múltiples sindicatos sectoriales y territoriales, cosa qu’obligó al gobiernu español a lexislar mediante lo que se conoció como’l «Icetazo». El refugu a esto, por insatisfactorio, llevómos a urdir una segunda convocatoria de fuelga, cosa que mos permitió que dalgunos partíos políticos punxeran atención nello y conocieran el problema. Llogremos d’esti xeitu qu’en trámite parlamentariu se modificaran delles de les idees más negatives del Decretu orixinal presentáu pol ministru Miquel Iceta. Demostremos que yera posible intervenir y exercer presión. Frente a quien dicíen qu’un procesu estraordinariu d’estabilización per concursu de méritos yera imposible y que too tenía que pasar pela convocatoria d’oposiciones, la realidá acabó imponiéndose y llevómos hasta‘l procesu actual que, insisto, ye inda insatisfactorio pa SUATEA.
El nuesu sindicatu ye útil pa lluchar pola meyora de les condiciones llaborales del profesoráu asturiano. Mantuviemos la petición de reconocencia de les 23 hores lectives pal profesoráu de Primaria y Infantil; la necesidá urxente de revisar la ratio d’alumnáu per aula; la reducción d’hores lectives pa quien tienen más de 55 años; los díes de llibre disposición, como nel restu de Comunidaes; l’añu sabáticu; la equiparación nel accesu a la xubilación ente’l personal interín y funcionario y ente quien entraron na función pública primero o depués del añu 2011; denunciemos que la llei de FP supón una xuba del pesu de los intereses empresariales frente a la función formativa del trabayu docente; trabayemos por un cuerpu únicu docente que nun tenga que sufrir les consecuencies de planes negociaos na solombra de los despachos que promueven les diferencies y la estratificación salarial. Defendimos la homologación salarial col restu de CCAA, ensin condiciones nin evaluaciones. A igual trabayu, igual salariu.
SUATEA ye un sindicatu útil y fai-y falta al profesoráu. Pola so vocación de trabayu unitariu, pola horizontalidá, ensin xerarquíes nin cultos a la personalidá, onde cada afiliáu o afiliada pue participar y facer parte activa na toma de decisiones. Tamos presentes y damos respuesta a les necesidaes del profesoráu na vida diaria de los centros y nun somos una organización paracaidista qu’apruz cada cuatro años.
Por todo ello, polo que mos queda per delantre, en mediu d’un panorama marcáu pola incerteza, SUATEA fai más falta que nunca. Por todo ello, pidimos al conxuntu del profesoráu’l votu pa SUATEA nes eleiciones sindicales del próximu 1 d’avientu.
Tino Brugos.
Miembru del secretariáu de SUATEA
Candidatu nes eleiciones pola lista de SUATEA
Esta entrada está disponible en: Castellano (Castellanu)
