SUATEA denuncia’l desallugu de la Escuela d’Arte d’Avilés y defende’l patrimoniu públicu

El Sindicatu Unitariu Autónomu de Trabayadores de la Enseñanza d’Asturies (SUATEA) denuncia la decisión d’espulsar al alumnáu de la Escuela Superior d’Arte del Principáu d’Asturies, que dende va décades desenvuelve’l so llabor educativu nel Palaciu de Camposagrado, para dexar esti edificiu públicu y patrimonial a la Universidá privada Nebrija. Trátase d’un ataque directu a la educación pública y al so derechu a ocupar espacios de valor cultural y hestóricu, en beneficiu d’un modelu privatizador qu’avanza n’Asturies cola instalación de nueves universidaes privaes mientres lo público abandónase y emprobezse.

SUATEA considera qu’espulsar a estudiantes y docentes d’un centru públicu pa dalos a una institución privada ye un espoliu inalmisible que fraya’l derechu a una enseñanza pública, accesible y de calidá, y qu’amás supón un pasu más na mercantilización de la educación. El Palaciu de Camposagrado nun puede convertise en moneda de cambéu pa intereses privaos: ye patrimoniu hestóricu y cultural d’Avilés y tien de siguir al serviciu de la comunidá, garantizando la continuidá de la enseñanza artística pública en condiciones dignes.

El sindicatu denuncia tamién la falta de tresparencia y participación nesti procesu, que se llevó alantre ensin cuntar cola comunidá educativa y ensin garantizar que’l treslláu de la Escuela d’Arte al PEPA pueda facese con recursos, espacios y condiciones afayadices. La improvisación y la opacidá cola que s’actúa xeneren incertidume nel alumnáu y el profesoráu y evidencien l’ausencia d’un proyectu sólidu pa reforzar la educación pública.

Por too ello, SUATEA esixe la paralización inmediata de cualquier midida qu’implique’l desallugu de la Escuela d’Arte, reclama que’l Palaciu de Camposagrado siga siendo un espaciu públicu al serviciu de la enseñanza y demanda al Gobiernu del Principáu qu’abandone esta política de favorecer a les universidaes privaes en perxuiciu de la pública. Frente al espoliu de lo común y a la avance de la privatización, SUATEA afita’l so compromisu cola defensa d’una educación pública, gratuita y calidable como patrimoniu irrenunciable de tola ciudadanía, y llama a la movilización en defensa de la Escuela d’Arte d’Avilés y de la educación pública asturiana.