SUATEA denuncia l’aumentu de la carga llectiva en xunu y setiembre pal profesoráu d’Infantil y Primaria

El Sindicatu Unitariu Autónomu de Trabayadores de la Enseñanza d’Asturies (SUATEA) manifiesta’l so refugu rotundu énte la decisión unillateral de la Conseyería d’Educación d’aumentar la carga llectiva del profesoráu nos meses de xunu y setiembre, una midida adoptada ensin diálogu nin negociación coles organizaciones sindicales.

Dende SUATEA siempre defendimos el drechu de les families a un serviciu de comedor públicu y de calidá, polo que, igual que munches madres y padres asturianos, nun podemos más qu’allegranos pola ampliación d’esti serviciu. Sicasí, consideramos totalmente inaceptable qu’esta reivindicación social s’use como xustificación pa empeorar les condiciones llaborales del profesoráu, ensin alderique previu nin consensu dalgunu.

Queremos recordar a la sociedá que, nos meses de xunu y setiembre, el profesoráu caltién la so xornada llaboral completa nos centros educativos; la única diferencia ye que les hores nun llectives d’esos dos meses destínense a xeres fundamentales pa garantizar la calidá educativa: ellaboración d’informes, evaluaciones iniciales, programación del cursu o memoria final, ente otres. La merma d’hores llectives nesti periodu respuende a criterios pedagóxicos y organizativos, non a privilexos llaborales.

Mientres per un llau l’Alministración sobrecarga al personal docente con xeres burocrátiques cada vez más intenses, per otru pretende ampliar la so xornada llectiva ensin aumentar los recursos humanos nin materiales.
Esta midida nun ye más qu’una ocurrencia que pue acabar escomiendo entá más la calidá de la educación pública asturiana, y respuende a argumentos demagóxicos y oportunistes que, por si fuera poco, podríen acabar enfrentando al profesoráu coles families.

Amás, refugamos que dende la Conseyería s’afirme qu’esta midida respuende a demandes sindicales, yá que, como yá diximos, nun se nos comunicó nada en nenguna de les munches xuntes calteníes.
Recordamos que, como se publicó recién nun informe que dieron a conocer los nuesos compañeros de STECyL, el profesoráu del Estáu español ye yá ún de los que más carga docente tien en tola Unión Europea, con 854 hores llectives añales en Primaria frente a una media de 703 nel restu de la Unión.

Dende SUATEA esiximos, en primer llugar, que se desvincule la introducción del serviciu de comedor en xunu y setiembre —tan necesariu y con un impautu ensin dulda enforma positivu— de cualquier modificación nes condiciones llaborales del profesoráu. Reclamamos amás l’apertura inmediata d’un procesu de negociación tocante a esti importante cambiu, nel que s’escuche la voz llexítima de quien representamos al personal docente.