SUATEA denuncia l’abandonu de la escuela de Zurea y esixe una actuación inmediata de la Conseyería d’Educación

L’alumnáu vese obligáu a usar el centru social del pueblu al caducar el pliegu ensin que siquiera empecipiasen les obres na escuela 

Dende SUATEA llevamos tol cursu denunciando’l deterioru xeneralizáu de les infraestructures de la rede educativa pública asturiana, mientres sigue medrando l’asignación presupuestaria pa la rede concertada. Un de los casos más graves y que nos muel ye’l de la escuela de Zurea, perteneciente al CRA de Campumanes, nel conceyu de L.lena. 

La situación d’esti centru ye la resultancia d’años d’abandonu d’un edificiu que se llevantó na dómina de los 50. L’equipu de gobiernu municipal lleva tiempu enforma reclamando l’arreglu d’una cubierta que fae que l’usu del edificiu nun se seguru. Tres una primer actuación provisional, que consistió en poner teya enriba una cubierta d’uralita, el Gobiernu asturianu terminó asignando presupuestu y axudicando un proyectu de reforma. Sicasí, a día de güei, el pliegu venció ensin que la obra s’executara y la empresa axudicataria enfréntase a penalizaciones pol incumplimientu de los plazos.

Paez que’l próximu cursu va empezar nes mesmes condiciones que l’actual, porque ye necesario empecipiar un procesu nuevu de llicitación y volver empezar dende cero. L’historial de desperfectos d’esti centru ye bien grande. L’edificiu principal presenta un deterioru estructural curiosu, con problemes nes cubiertes, goteres y mugor. Amás hai defectos graves nos accesos, les valles perimetrales tienen mala traza como’l toldu de protección solar y tamién hai culiebres na redolada de la escuela. Too ello supon un riesgu evidente pa la seguranza d’alumnáu y del profesoráu. La situación llegó a un puntu críticu a mediaos de 2025, cuando l’airón llevó’l teyáu. Viendo’l peligru, les families decidieron nun llevar a les sos fíes y fíos al centru.

Dende SUATEA esiximos a la Conseyería d’Educación qu’impulse un plan d’inversión ambiciosu pal arreglu, adecuación y caltenimientu de l’aula de Zurea  y del conxuntu de la rede pública educativa asturiana. Nun puede falase de vertebración del territoriu y de Pactu pel Mediu Rural mientres tenemos escueles cayéndo a cachos.