SUATEA demanda desdobles de llaboratoriu y hores de preparación de práctiques

SUATEA demanda que la Conseyería estableza de forma xeneralizada y obligatoria les hores de preparación de práctiques y los desdobles de llaboratoriu.

Naide almitiría que n’Educación Física nun se realizara nenguna actividá física, qu’en música nun sonara nin una nota, o que les matemátiques quedaren amenorgaes a un conxuntu d’axomes y postulaos teóricos ensin realizar exercicios y problemes. Sicasí, aceptamos con facilidá una aberración asemeydar: la enseñanza de les ciencies esperimentales ensin esperimentos. Tamos acostumaos a que los llaboratorios de los institutos nun s’usen (o inclusive a que s’usen como aules d’otres materies), y a asumir que les asignatures de ciencies esperimentales nunca salgan del marcu puramente teóricu. Nun cabe pensar que sía por esganu del profesoráu, que, pol so propiu perfil (físicos/ques, químicos/ques, biólogos/es, xeólogos/es…) presupónse-yos un gustu polos esperimentos. Tampoco ye un problema curricular, pues les práctiques de llaboratoriu apaecen de forma esplícita nos decretos curriculares, y non nuna cantidá pequeña. Entós, ¿cuála ye la causa de l’avezada ausencia de les práctiques de llaboratoriu nos centros d’Educación Secundaria? Les condiciones llaborales y horaries que lo torguen.

Na so asamblea d’entamu de cursu, SUATEA aprobó una resolución na que defendía la necesidá d’establecer unes condiciones llaborales y de personal que favorecieren les práctiques de llaboratoriu nes materies científiques y les práctiques de taller nes materies técniques. Anguaño, la realización de la parte práctica d’estes materies cunta con dos grandes problemes que frenen la so universalización. De primeres, la xestión de los espacios asociaos (llaboratorios y talleres) y la preparación de les práctiques rique un tiempu que non siempres tien allugamientu nel horariu. Anque esiste la hora de preparación de práctiques (una hora complementaria), esta ye afitada o non nel horariu del profesoráu según el criteriu del equipu directivu de cada centru, lo que xenera una disparidá total. Puede haber unos centros onde tol profesoráu de ciencies disponga de tiempu pa la preparación de les práctiques de llaboratoriu y otros onde nengún miembru del profesoráu disponga d’esta hora. Nestos postreros, el profesoráu va tener que decidir ente realizar esi llabor con hores estra voluntaries y non remuneraes (cargar sobre’l tiempu llibre del profesoráu, como si d’una aficiónse tratare, lo que tendría de tar afitao dientro del so horariu de trabayu), o nun faelo, lo qu’implica nun realizar nenguna práctica de llaboratoriu. Dende SUATEA, apostamos nidiamente por afitar obligatoriamente una hora de preparación de práctiques nel horariu del profesoráu d’estes materies.

En cualisquier casu, inclusive si reconocieren les hores de preparación de práctiques, siguiríen ensin dase les condiciones de seguridá necesaries pa la so realización. El trabayu nel llaboratoriu nun ye, nin tanto, una actividá ensin riesgos. El control d’esos esperimentos, y les midíes de seguridá adicionales que se riquen en comparanza col trabayu n’aula ordinaria, obliguen a que los grupos que realicen práctiques de llaboratoriu nun tengan más de 12 alumnos, siendo necesario que s’enllanten de forma ordinaria los desdobles de llaboratoriu, siquier, nos dos primeros cursos de la ESO. El costu horariu d’esos desdobles nun puede recayer nes necesidaes del centru, poles desigualdaes qu’eso xeneraría. Eses hores han de tar contemplaes a la hora de dotar de personal docente a los centros. Pa ello, proponemos que, a la de contabilizar les hores p’asignar al profesoráu, yá se contabilice esa hora de desdoble, pa garantizar el personal necesario. Por exemplu, un grupu de 2º d’ESO supón 4 hores de Física y Química. En llugar de contabilizar 4 p’asignar al profesoráu, contabilícense 5. Asina’l departamentu siempres va poder disponer de la carga horaria abonda pa realizar los desdobles de llaboratoriu.

Na xunta caltenida cola Conseyera d’educación al entamu del cursu, yá se-y treslladó esti pidimientu, xunto col restu de demandes del nuesu sindicatu. A partir del segundu trimestre, SUATEA empecipia la campaña pa llograr estos oxetivos.