Decidimos convocar FUELGA en Infantil y Primaria

Decidimos convocar fuelga en Infantil y Primaria y llamamos a la unidá sindical énte la imposición de la Conseyería

El Sindicatu Unitariu Autónomu de Trabayadores de la Enseñanza d’Asturies (SUATEA) comunica que, na xunta celebrada esta tarde y abierta a tola afiliación, decidió convocar fuelga en respuesta a la decisión unilateral adoptada pola Conseyería d’Educación de modificar les condiciones llaborales del profesoráu d’Infantil y Primaria, eliminando la xornada reducida en xunu y setiembre.

Dicha midida, impuesta ensin preavisu, foi adoptada ensin diálogu nin negociación coles organizaciones sindicales, lo que constitúi un ataque frontal a la representación llegal del profesoráu asturianu. La Conseyería despreció les múltiples solicitudes d’apertura d’un procesu negociador y confirmó públicamente, al traviés de los medios, la so negativa a modificar la decisión. Dende SUATEA denunciamos con firmeza esta imposición, que degrada les condiciones llaborales del profesoráu y pon en riesgu la calidá de la educación pública asturiana.

Recordamos, en primer llugar, que sobren motivos pedagóxicos pa defender l’amenorgamientu de xornada en setiembre (periodu d’adaptación) y en xunu (cuando l’alumnáu ta yá cansáu). Amás, ye importante recordar a la sociedá asturiana que nesos dos meses el profesoráu caltién la so xornada llaboral completa, a la que suma la realización de xeres pedagóxiques esenciales como informes, evaluaciones, programación y memoria del cursu. Eses xeres son clave pa garantizar una enseñanza de calidá y nun pueden vese recortaes en favor d’una sobrecarga d’hores lectives ensin planificación nin recursos adicionales.

Como siempres fiximos, sofitamos l’ampliación del serviciu públicu de comedor escolar como un derechu social. Sía que non, consideramos inaceptable que esta midida s’utilice como escusa pa empeorar les condiciones de trabayu del personal docente, ensin consulta, ensin diálogu y ensin consensu.

Amás, refutamos rotundamente les afirmaciones de la Conseyería que intenten xustificar esta midida como frutu de demandes sindicales. SUATEA nun foi informáu nin consultáu en denguna de les xuntes calteníes previamente, lo que demuestra el calter unilateral y autoritariu d’esta actuación.

Énte esta situación, y en defensa de los derechos llaborales del profesoráu, dende SUATEA llamamos a toles organizaciones sindicales a la unidá d’aición. Namás una respuesta sindical fuerte, xunida y decidida podrá frenar esti atropellu a los derechos del colectivu docente y a la educación pública asturiana. Una vegada nos xunamos col restu de sindicatos, daremos a conocer la fecha o feches de la fuelga, esperando, como dicimos, poder actuar con una sola voz.