SUATEA contra l’ERE n’Educación.

PROPUESTES DE SUATEA ANTE LA OPE 2017 Y EL PROCESU  D’ESTABILIZACIÓN DEL PERSONAL DOCENTE: NUEVU ALCUERDU D’INTERINIDÁ, NÚMBERU MÍNIMU DE PLACES POR ESPECIALIDÁ, COORDINACIÓN COL RESTU DE CCAA.

A. A nivel autonómicu

En xuntes coles organizaciones sindicales, la Conseyería d’Educación d’Asturies propón una Ufierta d’Emplegu de 759 places correspondientes a la tasa adicional pa la estabilización d’emplegu temporal más  347 places a la tasa de reposición de 2017.

Nesta distribución por cuerpos docentes (Cuerpu de Maestros: 355, Secundaria: 239, Formación Profesional: 72, Escuela Oficial d’Idiomes: 2, Música y Artes Escéniques: 18, Artes Plástiques y Diseñu: 15, Maestros de Taller, artes plástiques y diseñu: 3.) inclúyense tamién la distribución en 81 especialidaes, con distintu númberu de places en caúna: 26 especialidaes namás tendríen 1 plaza; 16 especialidaes, 2 places; 7 especialidaes, 3 places, etc.

Ante esta propuesta, dende SUATEA queremos facer les siguientes valoraciones y propuestes:

Valoraciones:

1. Si esta propuesta s’executara, la convocatoria de 2018 afectaría a 68 especialidaes de Secundaria, Formación Profesional, EOI, Música y Artes Escéniques. Ello traería, n’aplicación del Alcuerdu de profesoráu interín vixente n’Asturies, robláu en 2014 por FETE-UXT y ANPE, la consiguiente rebaremación de les llistes en caúna de les 81 especialidaes tres tol procesu d’oposiciones. Podría suponer la perda de l’emplegu pa cientos d’interinos ya interines.
2. Manifestamos el nuesu desalcuerdu cola propuesta de l’Alministración de convocar les places de la tasa de estabilización en namái dos convocatories, ente 2018 (Secundaria, Técnicos de FP, EOI y Música y Artes Escéniques) y 2019 (Cuerpu de Maestros y Profesores d’Artes Plástiques y Diseñu y Cuerpu de Maestros de Taller Artes Plástiques y Diseñu). El mesmu MECD propunxo nel mes de xunu que’l procesu se dea en trés ufiertes d’empléu y s’execute nos próximos cinco años, tratando d’igualar les oportunidaes pa cada cuerpu docente, con dos años pa cada unu y un últimu añu “escoba” pa tolos Cuerpos docentes, lo que foi aceptao polos sindicatos. Sicasí, de forma sorprendente, les centrales sindicales d’Asturies, con esceición de SUATEA, tán almitiendo que-yos val la propuesta de l’Alministración  asturiana d’executar el plan nel 2018 y 2019 nuna sola convocatoria por cada cuerpu docente. Quedaríen pa los años siguientes les vacantes de la tasa de reposición que fueren surdiendo, que los sos númberos suelen ser simbólicos.
3. Consideramos que la propuesta de la Conseyería d’Educación d’aprobar una OPE qu’afecta a 81 especialidaes y que se va a executar en dos años, to ello al marxe de lo que pueda decidise n’otres CCAA, ye absolutamente imprudente y ventureru pa les persones aspirantes de Asturies.

Propuestes:

1-         La negociación urxente d’un nuevu Alcuerdu d’interinidá que torgue la rebaremación y el riesgu de despidu de más de mil persones.

2-         Que nun se convoque nenguna especialidá con menos de 5 places, sacantes esceiciones que tendríen de ser axustaes colos sindicatos. La propuesta de convocar 42 especialidaes con 1 ó 2 places apenes daría oportunidaes de consiguir plaza de funcionariu/a, pero sí va suponer la rebaremación de llistes d’interinidá y el posible despidu de munches persones. Nestos casos, proponemos que nun se convoquen.

3-          Coordinación de les distintes CCAA pa evitar desaxustes y ábanu d’opositores d’unes Autonomíes a otres en función del númberu de places y especialidaes convocaes, según coordinar los tiempos d’execución.

B. A nivel estatal

Nel mes de xunu hebo una Mesa sectorial nel MECD y la mayoría de los sindicatos presentes na Mesa sectorial del MECD propunxeron camudar el sistema d’accesu pa que estes convocatories adicionales d’ufiertes d’empléu, pola aplicación del Alcuerdu de 29 de marzu y los PGE de 2017, sirvan realmente para consolidar nel empléu al profesoráu interín.

El MECD emplazó a les OOSS a una nueva Mesa de negociación nel mes de setiembre, que tovía nun foi convocada. El llunes 18 de setiembre, tolos sindicatos que constitúin la Mesa sectorial esixeron por escritu al MECD la convocatoria urxente de dicha Mesa pola importancia de los temes a decidir y la falta de tiempu de cara a les convocatories que puedan axustase.

SUATEA y los STEs abogamos por un sistema estremáu d’accesu. Agora bien, nesta situación estraordinaria, vamos faer lo posible por que nun s’executen estos procesos selectivos pol sistema d’accesu anguaño vixente. Pa ello, vamos defender un nuevu sistema d’accesu que dexe valorar hasta’l máximu llegal permitíu la esperiencia docente y que les sos pruebes nun sían eliminatories y tean más empobinaes a la competencia pedagóxica de les persones aspirantes. Por ello, esiximos al MECD qu’abra darréu esta negociación.

C. Convocatoria d’asamblea de profesoráu interín

A lo último, énte la propuesta de l’Alministración asturiana, que quier zarrar un alcuerdu ente les distintes OOSS en septiembre/ochobre y la OPE en payares, SUATEA va convocar pronto asamblees informatives p’aldericar estes problemátiques y adoptar les midíes que’l colectivu considere oportunes.

El secretaríau de SUATEA

N’Uviéu a 22 setiembre de 2017