STES-i nes ponencies de II Congresu mundial contra’l neolliberalismu educativu

Esta entrada está disponible en: Castellano (Castellanu)

STES-i PARTICIPA NES PONENCIES DEL II CONGRESU MUNDIAL CONTRA’L NEOLLIBERALISMU EDUCATIVU CELEBRÁU EN PANAMÁ DEL 5 AL 9 DE XUNU.

  • El desembarcu de les Ed Tech na Educación, impulsaes pola andancia, aprovechó la oportunidá de negociu y la idea de modernidá pa imponer nueves corrientes pseudopedagóxiques que suponen na práctica tresformar  la escuela nuna fábrica de trabayadores en réxime  d’autoexplotación al serviciu de les compañíes tresnacionales. Podemos falar claramente de la espansión d’una gobernanza dixital.
  • El primer país en paralizar planes globalizaos de dixitalización foi Suecia, onde la so ministra d’Educación abandona les pantalles y recupera tanto los llibros de testu como la escritura a mano, depués de los resultaos tan ruinos en comprensión llectora qu’apurre l’últimu informe de PIRLS.
  • La representación de STEs punxo’l focu, na so intervención,  na complicidá de los organismos supranacionales pa la evaluación de los procesos d’enseñu aprendimientu y el negociu venceyáu a la innovación educativa, qu’entiende nos sos inxustos términos aquello de que “la educación encierra una ayalga”.

Baxo’l títulu: “Estratexes pa convertir la Educación nuna mercancía”, la representación estatal de STEs-i –modelu sindical mayoritariu nel enseñu del nuestru país- analizó les semeyances ente’l nuestru sistema educativu col del restu de países, afondando na idea d’una mundialización progresiva de la educación cola sida d’afalar la converxencia global al traviés d’un modelu competencial con un espaciu común de cooperación tresfronteriza, qu’ufre un reconocimientu mutúu de los periodos d’estudiu, títulos y cualificaciones sacaes, una filera d’estándares en toa riegla pa encarar los retos del sieglu XXI, cuando en rialidad tien intereses falsos.

Pero ca vez son más les voces nos distintos continentes que se rebelen contra la idea de ver la educación como un bien de consumu en cuenta d’un derechu pa torgar que les oportunidaes y recursos tean concentraos en manes d’aquellos que podíenn pagar por ellos. Priorízase’l desarrollu d’habilidaes y competencies especifiques pa cumplir coles demandes del mercáu llaboral, en cuenta d’enfocase na educación xeneral y humanística, dándo-y al alumnáu una cultura que-y permita un pensamientu críticu pa entender la contorna na que vive, conocer les inxusticies y les causes que les provoquen. Por contra, empondérense conceptos como l’“emprendimientu” y la competitividá ente centros, profesoráu y el propiu alumnáu; individualismu puru y duru.

En tolos países, el profesoráu sufre campañes de desprestixu  no que toca a la so metodoloxía  con andanaes como: “tán enseñando pa un mundu que yá nun existe” o; “los trabayos del futuru nun s’inventaron tovía”, proponiendo como alternativa una pedagoxía esclusivamente subordinada a les empreses tecnolóxiques, con unos oxetivos económicos, mazcaraos eso sí de filantrópicos y sociales. La Educación queda como un negociu y trátase como un productu que se compra y se viende, condenando a la ciudadanía a ser cliente de por vida, como un “pagu recurrente” a les grandes compañíes a escala planetaria.

Dellos países empezaron a reaccionar. El primeru foi Suecia, onde la so Ministra d’Educación –Lotta Edholm- decidió paralizar el plan de dixitalización depués de la “crisis de llectura” que rescampló cola publicación del informe PIRLS (estudiu comparativu ente países que mide la comprensión llectora). La midida abandona les pantalles de les aules y recupera tanto los llibros de testu como la escritura a mano. Esti comportamientu afonda na idea que comparten los propios gurús de les tecnolóxiques, qu’escolaricen a les sos fíes y fíos alloñaos de tabletes y móviles.

Otros asuntos trascendentales como la medría de la segregación escolar afalada poles sucesives esternalizaciones y la so rellación cola creciente desigualdá social, son patrones que se repiten en tolos continentes y que s’analicen con fondura nesti Congresu Mundial.

De la mesma forma, aborda otros problemes comunes en tolos territorios: la desregulación de la FP al traviés de la collaboración “público-privada”,  la precarización o  “uberización” de la profesión docente, degrada la xera d’enseñar, yá de por sí mui esgastada pola creciente burocracia que vien soportando y los fondos recortes na inversión educativa y nos derechos llaborales que mengüen la calidá educativa y la motivación del profesoráu. Tamién se vienen privatizando servicios públicos como la llimpieza de los centros escolares, el tresporte, los comedores,  el mantenimientu informáticu o el copagu que suponen les tases universitaries. Las resoluciones aprobaes n’acabando, afonden na idea de xuntar esfuerzos colectivos baxo la conseña “NIN SE VIENDE NIN SE RINDE” pa torgar que’l profesoráu se convierta nun repartidor low cost d’una mercancía llamada conocimientu.

Print Friendly, PDF & Email

Esta entrada está disponible en: Castellano (Castellanu)