STEs-i critica la falta d’un plantegamientu global del PSOE escontra la LOMCE

Énte l’anunciu de seronda caliente” en materia educativo qu’acaba de realizar la diputada del PSOE y secretaria d’Educación, Mª Lluz Martínez Seijo, la Confederación de STEs-intersindical quier manifestar per aciu esti comunicáu de prensa, la so crítica a la falta d’un plantegamientu global contra la LOMCE que ta demostrando esta fuerza política.

N’efectu, yá nel últimu alcuentru billateral que caltuvimos cola diputada Martínez Seijo fai agora un mes, tresmitímos-y la nuesa esmolición por derivar que podíen adquirir los trabayos de la subcomisión parlamentaria que trata l’asuntu del llamáu “pactu educativu”. Tamién na citada entrevista, comunicóse-y la posición de STEs-i absolutamente contraria a la LOMCE y la nuesa esixencia de derogar esa llei, cosa que l’actual aritmética parllamentaria fai posible. Agora, con estes manifestaciones que se centren puramente na asignatura d’Educación pa la Ciudadanía, la nota de Relixón y los conciertos educativos de los centros privaos que segreguen por razón de sexu, el PSOE ta demostrando que sigue ensin tener un plantegamientu global en rellación a la LOMCE, y que se llinda a centrase puramente nos trés o cuatro aspeutos puntuales que, nel so día, más pudieron llamar l’atención de la opinión pública.

Pa STEs-i ye necesaria una derogación completa de la LOMCE o, nel so casu, un replantegamientu xeneral de tola so filosofía que vaiga acompañáu de toa una serie de cambeos lexislativos lo que, de nenguna manera, puede circunscribise a trés aspeutos puntuales, por importantes qu’estos puean ser.

Dende la nuesa Confederación siempres apostemos por un gran alcuerdu educativu, pero ésti tien que ser, de primeres, con tolos sectores que formamos parte de la comunidá educativa, sectores que nel so día y mientres se tramitaba’l proyeutu de llei, ya inclusive dempués de la so aprobación, manifestemos una oposición frontal a la mesma. A última hora, la Confederación de STEs-intersindical fai un llamamientu al PSOE, y polo xeneral a les fuercies polítiques de la oposición, por que faigan un cuestionamiento a xeitu del conxuntu de la LOMCE y por que se pongan a trabayar nel Parlamentu col envís de sustituyir l’actual llei por otra acordies col modelu pol que mos movilicemos nos últimos años la mayoría de la comunidá educativa. Esto ye, sustituyir l’actual modelu LOMCE, segregador, autoritariu, centralizador, confesional y privatizador por otru comprensivu, democráticu, respetuosu colos territorios y les sos llingües propies, laicu, progresista y que ponga l’acentu nel calter públicu que tien que tener tou sistema educativu.

Secretariáu de STEs-intersindical
31 d’agostu de 2017