Sistemática vulneración de los derechos llingüísticos del alumnáu d’Educación Infantil

Un mes depués d’entamar el cursu escolar, los colexos mierenses Aniceto Sela y Santiago Apóstol siguen ensin dotación de profesoráu d’Asturianu p’atender al alumnáu d’Educación Infantil (EI) que demanda recibir estes enseñances. Esta situación ye recurrente pues vien repitiéndose nel tiempu.

Hai dos años, a 18/11/2020 yá denunciábemos en comunicáu de prensa que nel colexu Aniceto Sela, depués de más de dos meses d’entamáu’l cursu, siguíen ensin profesoráu d’Asturinanu p’atender a parte del alumnáu de Primaria y a la totalidá de lo d’Educación Infantil.

La situación iguóse depués de tres meses d’espera y el cursu 2020/21 siguieron recibiendo clases d’Asturianu. Esti cursu torna a repitise la falta d’atención d’esta demanda educativa.

Nel colexu Santiago Apóstol, suprimióse-yos la enseñanza d’Asturianu na (EI) tol cursu pasáu 2021/22, magar tener impartío estes enseñances a lo llargo d’una montonera años con una demanda allegada al 100% del alumnáu. Esti cursu 2022/23 siguen pel mesmu camín: con cuasi’l 100% del alumnáu demandando l’Asturianu nun se dota con profesoráu pa impartir estos conteníos.

Ye de solliniar tamién la tardanza na dotación de profesoráu de Gallego-Asturianu que se repite tolos años. Siguen tovía ensin recibir esti profesoráu na escuela de Grandas de Salime y nel IES de Navia cubrióse’l puestu la selmana pasada.

Esta forma d’actuar de la Conseyería d’Educación nun dotando del profesoráu especialista necesario p’atender la demanda de la enseñanza d’Asturianu na EI ye sistemática, va xeneralízándose añu tres añu, y ye contraria a derechu. Atiende esclusivamente a criterios economicistes de recortes nel gastu a costa de los derechos de los padres y madres. Vulnera dafechu la llei d’Usu de 1998 que nel so artículu 10.1 diz: “Nel exerciciu de les sos competencies, el Principáu d’Asturies tien de garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu.”

Tampoco atiende al mandáu de la nuestra llei cimera, Estatutu Autonomía d’Asturies, que nel so artículu 4, nel so puntu 2 faciendo refencia al asturianu recueye “ …promoverase’l so usu, la so difusión nos medios de comunicación y la so enseñanza…”

Tan sistemáticu ye’l frayamientu de los nuestros derechos llingüísticos y l’incumplimientu de les nuestres lleis, que l’acabante espublizar currículu d’EI nun recueye nengún conteníu referíu a les nuestres llingües patrimoniales. Esta ausencia curricular supón amás una ruptura drástica na transición de la llingua materno-ambiental a la institucional-escolar con bultables consecuencies negatives nel procesu de deprendimientu, nel procesu de recuperación llingüística y na falta de continuidá nos conteníos ente la etapa EI y Primaria.

Ye por ello que dende SUATEA temos interpuesta demanda xudicial contra’l“Decreto 56/2022, de 5 de agosto, por el que se regula la ordenación y se establece el currículo de la educación Infantil en el Principado de Asturias” esperando seya atendida y la Conseyería Educación modifique esti decretu pa que respete los nuestros derechos llingüísticos.

Por tolo espuesto, dende SUATEA esiximos a la Conseyería Educación:

• La inmediata dotación de profesoráu de Llingua Asturiana nos centros mierenses “Santiago Apóstol” y “Aniceto Sela” pa que l’alumnáu d’EI puea recibir eses enseñances.
• La modificiación del “Decreto 56/2022, de 5 de agosto, por el que se regula la ordenación y se establece el currículo de la educación Infantil en el Principado de Asturias” pa que recueya conteníos de les nuestres llingües autóctones.

El Secretariáu de SUATEA

N’Uviéu a 5 d’ochobre de 2022