Sindicatos d’izquierda van promover movilizaciones polos derechos del personal interino

Los sindicatos de la izquierda combativa y de clase van promover nueves movilizaciones en defensa de los derechos del personal temporal ya interino del sector públicu.

El personal público precarizao como personal temporal ya interino n’abusu de la temporalidá, caltenemos les espaes n’altu, porque tres la votación del RDL nun camudó nada y ta too por consiguir. Los meses de setiembre y ochobre van ser cruciales pa intentar aclariar la incertidume sobre’l so futuru, y ye por eso que los sindicatos alternativos de la izquierda combativa y de clase, dende la más estricta observancia de l’autonomía ya independencia nel procesu de toma de decisiones, alcordamos siguir con nueves movilizaciones pa evitar que pretenda aplicase apresuradamente el RDL 14/2021; y tamién pa reconducir el so conteníu na tramitación del proyeutu de llei hacia posiciones más favoratibles al derechu a la estabilidá llaboral del personal afectao y al caltenimientu de la calidá de los servicios públicos.

Por esti motivu, anunciamos pa los meses de setiembre y ochobre, les siguientes acciones:

●             Presentación d’enmiendes totales y/o parciales al RDL.              

●             Movilizaciones descentralizaes nos distintos territorios.             

●             Manifestación en Madrid de sindicatos y plataformes de persones afectaes de tol Estáu.         

●             Fuelga xeneral nel sector públicu, si nun s’acolumbren cambeos sustanciales nel nuevu testu llegal.   

Esti revueltu mes de xunetu acabó con avances poco o nada significativos que dexen al colectivu de personal temporal ya interino en fraude de llei tener unes ciertes mires de meyora nes sos reivindicaciones d’estabilidá llaboral. L’Alcuerdu alcanzáu ente’l Ministru Iceta y les organizaciones sindicales CCOO, CSI-F y UGT sobre’l Plan de Choque pal amenorgamientu de la temporalidá la so consecuencia, el Real Decreto Llei 14/2021, ye un traxe a la midida de les alministraciones y entidaes públiques que, nun convence a casi naide.

Pal personal público n’abusu de temporalidá actual y futuro, estos testos constitúin una agresión ensin precedentes. Ensin siguir los encamientos del Tribunal de Xusticia de la Unión Europea (TJUE), nel sentíu d’introducir sanciones disuasories pa les alministraciones y entidaes públiques incumplidores de la Directiva Europea 1999/70), el RDL busca acabar cola temporalidá actual convocando un nuevu procesu estraordinariu d’estabilización por concursu-oposición, el cese automáticu del personal temporal que nel futuru axunte más de trés años ocupando una mesma plaza vacante y l’introducción d’una risible compensación económica en casu de ser despidío.

Al respective la convocatoria de procesos d’estabilización, el TJUE yá dictaminó que, en nengún casu, pol so calter abiertu y eliminatoriu, tienen la considerancia de sanción. Sobre’l cese o despidu automáticu, hai que dicir que ye una ficción llegal, p’aparentar que nun hai abusu de temporalidá y l’indemnización, como bien diz el Tribunal Supremu, por razón de la so escasa cuantía nun tien tampoco calter sancionador; ye una compensación económica pola finalización inesperada del contratu o nomamientu.

A última hora, les midíes que contemplen l’Alcuerdu y el RDL nun suponen una sanción proporcional y disuasoria pa les alministraciones abusadores y muncho menos, tienen un calter de protección de los y les y trabayadores temporales del sector públicu oxetu del abusu, qu’amás de ser les víctimes de la illegalidá, son les víctimes de les supuestes midíes de control de la temporalidá.

Unos argumentos que tamién se fixeron perclaros nel alderique del Congresu pa la ratificación del RDL 14/2021. Pocos grupos parlamentarios amosaron la so disposición a ratificalu y, si lo fixeron, foi en cuenta de la so tramitación como proyeutu de llei pa poder introducir enmiendes. Escenariu qu’obligó a la Ministra a asumir la so tramitación como proyeutu de llei y a suxerir que la fase de seleición podría nun ser eliminatoria o que delles persones en fraude de llei aportaren directamente a la fase de concursu.

Unos hipotéticos cambeos que siguen ensin cumplir les directrices del ordenamientu européu porque resalven l’elementu esencial de la directiva: la proteición de los y les trabayadores temporales oxetu frente al abusu de les alministraciones y entidaes públiques. Una proteición que namás va ser real y efectiva si cristaliza nuna sanción que dea la estabilidá llaboral d’esti personal colos mesmos derechos de permanencia y afitamientu que’l personal funcionario de carrera y fixo.

Emplegada y emplegáu públicu n’abusu: despierta, o muéveste o van movete. Agora o nunca, esti ye’l momentu.

06-08-2021