SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
Na mañana de güei, 18 de septiembre de 2020 se celebróse una rueda de prensa conxunta de Comisiones Obreres y SUATEA que’l manifiestu apaez a continuación.
En tiempos de pandemia, más recursos pa la Escuela Pública
L’entamu del cursu 2020-21, nun contestu de pandemia, va suponer un esfuerzu enorme pal profesoráu, comparable al que vien faciendo, dende va meses, el personal sanitario, que ta demostrando en tou momentu una gran responsabilidá y entrega profesional.
Otros sectores como’l personal del tresporte, de distribución d’alimentación, de recoyida de producción agrícola, de llimpieza, etc. enseñaron tamién el so compromisu cola sociedá. Del mesmu mou, el personal docente, cuando los primeros meses de la pandemia, cumplió col trabayu de forma exemplar, adaptándose a la nueva situación pa garantizar la continuidá del aprendizaxe.
Nesti aniciu de cursu, les y los trabayadores de la Enseñanza tamos dispuestos a dar un pasu alantre pa llograr que l’actividá escolar se ponga en marcha, magar les dificultaes previstes. Dar clase, nel contestu actual, supón un exerciciu de responsabilidá que nun ta llibre de riesgos. Sabemos que ye’l momentu d’agabitar.
La crisis sanitaria creada pola apaición del virus Sars Cov-2 dexó clara la necesidá de promover l’estáu social que tanto se cuestionara pente medies de dogmes neolliberales. Nos contestos de crisis, conozse que la intervención pública ye la única manera d’encariar los efectos de situaciones tan dramátiques como la que tamos viviendo.
Esta crisis valió tamién p’asoleyar les desigualdaes esistentes: contradiciendo la visión idílica que se suel dar de la sociedá de consumu, vióse que, en tol Estáu, y n’Asturies tamién, sigue habiendo bolses enormes de probeza y esclusión.
La situación de la Escuela Pública, que lleva más d’una década tocada por recortes y poles mal llamaes polítiques de “racionalización del gastu”, nun yera buena yá enantes del comienzu de la pandemia. Disponíemos de los recursos xustos pa funcionar con normalidá aparente a costa de la dedicación del profesoráu, que, magar les altes tases de temporalidá y la precarización creciente que carez, suplía les faltes col so esfuerzu. La llegada de la COVID19 dexó patente que la inversión educativa n’España ye tan escasa que nin siquiera se pudieron cumplir les prescripciones sanitaries que’l propiu Gobiernu fixara la primavera pasada como condición pa una vuelta segura a les aules. Pasu ente pasu, vimos cómo les ratios diben subiendo, la distancia social amenorgaba, nes evaluaciones de riesgos de los puestos de trabayu tán plantegándose adaptaciones cada vez más febles y la posibilidá de llograr una financiación mayor pa los centros educativos, finalmente, esfumóse.
Por una escuela presencial
La escuela nun ye namás un sitiu onde se desarrolla un procesu d’enseñanza-aprendizaxe de conteníos curriculares. Los aprendizaxes qu’afala la educación van más allá d’esta visión reduccionista y utilitaria de la enseñanza.
La escuela ye un espaciu de socialización, de tresmisión de valores democráticos, d’afectu, de diversidá, d’igualdá, de resolución pacífica de los conflictos, de compensación de les diferencies socioeconómiques y culturales… El papel que fai ye determinante p’afitar una igualdá mínima d’oportunidaes pa toes y toos.
Poro, nun podemos renunciar a la presencialidá de la educación. Con too, nun hai qu’aceptar qu’esto se faiga a cualesquier preciu. L’Alministración ha de garantizar que los centros educativos seyan espacios seguros. Fai falta tener protocolos rigurosos, formar al profesoráu en prevención y salú llaboral y dotar a los nuestros centros del personal y de los recursos precisos pa encarar con ésitu la xestión escolar de la pandemia.
En defensa de l’atención a la diversidá
L’atención a la diversidá ye una de les exes fundamentales pa consiguir una escuela y, por tanto, una sociedá inclusives. L’atención a la diversidá ha de garantizar la igualdá d’oportunidaes al alumnáu con independencia del so orixe o situación personal, faciendo por eliminar los pilancos pal aprendizaxe que puedan alcontrar a lo llargo la escolaridá y facilitando l’accesu a toles esperiencies, curriculares y sociales, que brinda la educación.
Sin embargu, una escuela inclusiva nun se construye recortando gastu n’atención a la diversidá, precarizando l’emplegu per aciu de medies xornaes nos perfiles venceyaos a esta cuestión o cuadrando partíes presupuestaries pente medies de retrasos nes contrataciones del personal de los servicios de Orientación.
Asturies sigue sin tener un Decretu d’Equidá que regule les llinies d’actuación nesta estaya y que garantice que, independientemente de los vaivenes políticos, los centros educativos dispongan de los recursos amañosos pa promover la prevención de problemes y l’atención temprana, dotando a la intervención educativa d’un calter compensador.
Más profesoráu, menos ratio: prevención y seguridá énte la COVID19
Cuando l’Estáu d’Alarma, la cuestión educativa convirtióse nún de los temes más trataos nos medios de comunicación, siendo oxetu d’un importante alderique políticu y social.
La falta d’un verdaderu Estáu social qu’enfrente con decisión cuestiones como la conciliación de la vida llaboral y familiar situaron al sistema educativu nel puntu de mira, como si la responsabilidá sobre la conciliación fuera competencia de la escuela, y non de les empreses o d’una Alministración que tendría qu’intervenir activamente nesta problemática de clares implicaciones sociales.
Refugamos una vuelta a les aules condicionada por una visión de la escuela como un sitiu que val pa curiar a los menores demientres les families cumplen coles sos obligaciones llaborales. La enseñanza presencial, como yá diximos, tiene que se facer garantizando seguridá nel procesu d’enseñanza-aprendizaxe. Pa ello, faen falta dos midíes:
La primera ye la reducción de la ratio d’alumnáu per grupu. Nun ye normal que’l Gobiernu asturianu pretenda qu’hasta 33 estudiantes puedan compartir l’espaciu d’un aula nel Bachilleratu, cuando hai menos de cuatro meses el Gobiernu d’España proponía una ratio de 15 estudiantes per aula. Y lo mesmo podíamos dicir, por exemplu, sobre l’alumnáu de 3u y 4u d’ESO, onde los agrupamientos previstos nun van suponer desdoble dalgún hasta nun sobrepasar el númberu de
27 estudiantes per grupu.
La única razón pa que la ratio nun seya más pequeña ye la negativa del Gobiernu asturianu a destinar más recursos presupuestarios a la educación.
Queremos recordar que les plantíes docentes yá yeren escases antes d’esta emerxencia sanitaria. Como yá se dixo, los recortes n’educación de los últimos años dexáranles a mínimos. Anguaño, mesmo teniendo teniendo en cuenta les partíes estraordinaries aprobaes pa encarar la pandemia, el presupuestu de la Conseyería d’Educación sigue tando per baxo del qu’había enantes de la última crisis económica.
La segunda, rellacionada cola anterior, ye la contratación del profesoráu necesario pa facer la reducción de ratios. Pese a l’anuncia del Gobiernu asturianu de la contratación de cientos de docentes -alredor de 600 na rede pública- el númberu nun llega p’acometer la vuelta a les aules coles garantías sanitaries mínimes.
Reclamamos que la salú prime sobre l’austeridá de los que pretenden salir d’esta crisis sin invertir nin un euru más n’educación. Esiximos que se contrate tol profesoráu necesario para que les nuestres aules seyan segures.
Les organizaciones firmantes vamos promover movilizaciones pal mes d’ochobre si estes reivindicaciones nun s’atienden.
¡Contra la fienda social, en defensa de la escuela pública asturiana!
Esta entrada está disponible en: Castellano (Castellanu)
