Conceyu del Comité de Fuelga

El Comité de Fuelga denuncia l’actitú intransixente de la Conseyería d’Educación y refuga los servicios mínimos por abusivos

Na mañana de güei, 21 de mayu, el Comité de Fuelga, integráu por CCOO, SUATEA y UGT, aconceyó cola Conseyería d’Educación del Principáu d’Asturies pa negociar los servicios mínimos de les fuelgues convocaes pal 27 de mayu y 5 de xunu en tolos centros públicos qu’imparten les etapes d’Infantil y Primaria.

L’alcuentru entamó cola esposición de los motivos de la fuelga por parte’l Comité, ente los que rescamplen:

• La modificación unillateral de la xornada en xunu y setiembre, que perxudica les condiciones llaborales del profesoráu de centros d’Infantil y Primaria.
  
• L’equiparación salarial, yá que’l profesoráu asturianu ye de los que menos cobra de tol Estáu.
  
• La necesidá d’un nuevu alcuerdu de plantiyes que garantice estabilidá y recursos abondos.
  
• Meyores na atención a la diversidá.
  
• Amenorgamientu de la burocracia.
  
• L’afitamientu de les midíes de reducción horaria específiques pa docentes mayores de 55 años acordaes l’añu pasáu.
  
• Reducción de ratios.
  

Énte estes reivindicaciones, la Conseyería d’Educación aneció y llegó a negar la evidente discriminación salarial del profesoráu asturianu. La Directora Xeneral de Centros, Cristina Blanco, llegó a asegurar que Asturies ye una de los territorios que meyor paga al so profesoráu, una afirmación que contradiz tolos datos disponibles.

Amás, l’Alministración declaró qu’una xuba salarial sería “illegal”, demostrando un despreciu absolutu escontra les y los trabayadores de la enseñanza pública.

Servicios mínimos abusivos: un ataque al derechu a fuelga

Respectu a los servicios mínimos, la Conseyería fixo saber que’l profesoráu que tenga que evaluar en díes en que se convoquen xornaes de fuelga va tener qu’asistir al 

centru considerándolos como servicios mínimos, al igual que un docente por cada tres unidaes n’educación especial, unu por cada cuatro n’educación infantil y/o primaria y unu en cada llocalidá de los CRA, asina como les direcciones más otra persona del equipu directivu.

Consideramos que se trata d’una cifra abusiva y desproporcionada que supón un intentu de vaciar de conteníu’l derechu a fuelga. Esti cambéu de criteriu implica que haya centros onde naide va poder exercer el so derechu a fuelga los díes 27 de mayu y 5 de xunu si hai convocaes evaluaciones.

El Comité de Fuelga denuncia esta maniobra de l’Alministración pa debilitare la movilización y esixe la retirada inmediata d’estos servicios mínimos abusivos.

Llamamientu a la participación masiva nes fuelgues

Énte la intransixencia y falta de respetu de la Conseyería d’Educación, el Comité de Fuelga reafirma la convocatoria de fuelga y fai un llamamientu a tola plantiya de los centros d’educación infantil y primaria a secundar masivamente les movilizaciones los próximos 27 de mayu y 5 de xunu.

La llucha por unes condiciones llaborales dignes, una educación pública de calidá y el respetu a los derechos de los trabayadores y trabayadores sigue más vixente que nunca.

¡Nun nos van callar! ¡Por una enseñanza pública digna!