Reunión cola directora xeneral Eva Ledo respecto a la rede d’escueles 0-3

Ayeri, llunes 5 de febreru, el SUATEA tuvo una reunión na Conseyería d’Educación con Eva Ledo, directora xeneral de centros, Rede 0-3 años y Enseñanzas Profesionales, a cuenta la integración de les escueles 0-3 años na rede pública asturiana. Dende’l nuestru sindicatu llevamos munchos años planteando que s’universalice’l 0-3, con calter públicu y de baldre, ensin recurrir a nengún tipu de conciertu educativu, y paez ser qu’estes demandes van ser una realidá nestos tres próximos años.

La directora xeneral entamó falándonos de los planes que yá conocíemos pal procesu d’integración: va escomencipiar siendo de baldre toles escueles 0-3 qu’hai n’Asturies pal cursu que vien, va siguir cola extensión per tol territoriu y va ponese’l ramu cola integración definitiva de les escueles de tolos conceyos, el procesu nun va rematar hasta últimos de la lexislatura, según les previsiones actuales. Too ello pasa porque s’apruebe una llei que regule esti ciclu educativu, tovía ta ensin fecha de publicación prevista pero, paeznos, va tar primero’l branu, de manera que permita incorporar personal autonómicu nel cursu 2024-25, lo mesmo pa les escueles nueves como pa les unidaes nueves que se van incluyir nos centros que yá hai.

Paeznos importante destacar, coincidiendo cola reivindicación del SUATEA, que descártase cualquier tipu de concertación pa facer frente a la demanda de places existente. Nun podemos cayer nel mesu error que yá se cometió a nivel estatal nos años 80 cuando, a cuenta la demanda tan alta de places escolares, decidióse concertar. Más de 40 años depués y calteniendo’l concordatu cola santa sede, ta afitáu nel Estáu, y sigue aumentando la so financiación mientres la rede pública sigue precisando recursos.

Nun tamos tan satisfechos coles poques certeces que se nos ufiertaron respecto al futuru de les trabayadores de la rede. Anguaño hai munches diferencies ente les trabayadores de les escueles nos conceyos asturianos que dan esi serviciu, en salarios y otres condiciones llaborales (permisos, calendariu, plantilles sustitución de baxes…) Sin embargo, la Conseyería nun nos adelantó cómo va iguase. Poco se sabe, tamién, respecto a qué va pasar colos procesos d’estabilización del personal que tienen qu’acabar a finales d’añu. De la mesma manera, tamos mui esmolecíos col tema la estabilidá de les plantilles, nuna etapa onde ye fundamental la continuidá de les trabayadores col mesmu grupu tol ciclu.

Tampoco nos dieron solución a les nuestres duldes d’otres demandes históriques del SUATEA, de les que destacamos la inclusión de conteníos de llingua asturiana nel currículum d’Educación Infantil de 3-6 años y que, por supuesto, esiximos tamién agora pa la rede 0-3.

Ye verdá que valoramos la importancia de la midida y l’ambición del Gobiernu a la hora de desenvolvela, pero siguimos teniendo munches duldes de cómo va ser la so implantación, y vamos siguir pidiendo que los derechos de les trabayadores nun se retayen al final del procesu.