Retrucando al Conseyeru d’Educación

Una vegada más el Conseyeru d’Educación arguyécese de la eficiencia de la so Conseyería n’arreglar la organización del próximu cursu escolar. Dende SUATEA nun podemos más que desdicilu en dellos aspeutos importantes pa la organización  del cursu y de los centros educativos.

Los centros de la escuela rural llaméntense de que nun s’ufiertaron toles places pal so fayadizu funcionamientu, aducen dende la Conseyería que se van autorizar al zarru de matrícula. Nós preguntamos a qué se debe esta negativa cuando tienen el mesmu númberu d’alumnáu que’l cursu pasáu y la matrícula en primaria yá ta cerrada. Trátase una vegada más de maltratar la escuela rural, y si non que lo digan, por casu, a les AMPAS de les escueles de Belmonte o Soutu de Lluiña que tán solicitando la dotación de profesoráu que la Conseyería-yos niega.

N’otru orde de coses detectemos que dalgunes de les places convocaes tán mal definíes y asina apaecen col códigu de vacante places qu’en realidá nun lo son; n’otros casos figuren delles places con perfil billingüe que tampoco esisten como tales. Nun s’ufiertaron les places de los centros d’adultos. Sabemos qu’entá falten places por salir que yá tenía autorizaes la mesma Conseyería y n’otros casos ufiértense medies xornaes cuando se precisaría una plaza a xornada completa pal fayadizu funcionamientu del centru, provocando una mayor precarización nes condiciones llaborales del profesoráu interín.

Paralela a la ufierta de places pa profesoráu interín publicóse la circular d’entamu de cursu onde en llugar d’esmolecese poles necesidaes reales de la escuela pública como garantizar la figura d’un profesor/a tutor/a para cada aula de primaria o l’amenorgamientu de periodos lectivos pal profesoráu (como sí tán faciendo otres comunidaes autónomes) consideróse más importante incidir na xestión de les xeres pa casa que s’unvien al alumnáu; poniendo en dulda la profesionalidá del profesoráu asturianu suxuriendo que nun corrixe los deberes que manda al so alumnáu.

Dende SUATEA esiximos a la Conseyería d’Educación un compromisu real y efectivu cola escuela pública asturiana y en particular cola escuela rural y el profesoráu asturiano.

Uviéu a 21 de xunetu 2017