Retayos por sorpresa – Mengüen unidaes en segunda vuelta

El xueves de la selmana pasada la Conseyería d’Educación comunicaba a los centros educativos por aciu un corréu electrónicu que yá taba disponible en Educastur la información correspondiente a la propuesta de númberu de grupos y de docentes pal próximu cursu 2016/17. Nel mesmu corréu dábense les instrucciones pa realizar los allegamientos a la propuesta de l’Alministración y marcábase una selmana de plazu pa realizar esi procesu.

Con éses, cual nun seria la sorpresa cuando dende SUATEA’l día d’ayeri dimos cuenta de que los datos disponibles en Educastur fueron modificaos minorando les unidaes de munchos centros educativos. Tratar d’una situación ensin precedentes una y bones l’Alministración nun comunicó esti cambéu a los centros educativos, lo que torga que realicen los allegamientos correspondientes al mesmu (recordemos que los allegamientos de la mayoría de los centros a la propuesta de l’Alministración yá fueren realizaes en base a la propuesta inicial).

Dende SUATEA’l mesmu martes pela tarde unvióse una nota urxente a los centros educativos por que consulten de nuevu la información disponible en Educastur con cuenta de presentar nuevos allegamientos correspondientes a esta última propuesta. Lo más grave del asuntu ye que los centros disponen hasta mañana xueves 2 pa presentar allegamientos y enteráronse d’estos cambeos por una nota unviada ayeri urxentemente por SUATEA. A día de güei la Conseyería d’Educación nun tien previstu ampliar el plazu de reclamación según confirmáronnos esta mañana.

Nun sabemos si tratar d’unu de los erros informáticos a los que lamentablemente esta Conseyería tiennos avezaos o si pela cueta tamos ante una maniobra pa despintar la nueva riola de retayos que’l gobiernu asturianu prepara pal próximu cursu. Sía que non esta situación nun fai más qu’amontar el descontentu nos centros nesti fin de cursu con cada vez más trabayu burocráticu ya inútil.

Por ello SUATEA esixe que los responsables de la Conseyería dean la cara ya informen a la comunidá educativa de los retayos que pretenden llevase a cabu de forma oscurantista y faciendo de menos el llabor de los equipos directivos y los claustru de profesoráu. Ye imprescindible ampliar el plazu d’allegamientos tres la pertinente información a les direcciones de los centros.

Pero nun escaezamos que’l fondu del asuntu ye que mientres nes Conseyeríes d’Educación d’otres CCAA ta realizándose una verdadera planificación educativa suprimiendo los conciertos con centros privaos ellí onde hai ufierta pública abonda, en Asturies son los centros públicos los que sufren los retayos de profesoráu derivaos de la baxada de la natalidá.

Amás, la Conseyería d’Educación fai oyíos sordos a los pidimientos sindicales d’amenorgar el númberu d’alumnáu per aula y d’aumentar la dotación de profesoráu de sofitu.

Uviéu, 1 de xunu de 2016