Plantiyes 2025-26: La conseyería recorta na pública pero non na concertada

La Conseyería recorta profesoráu de primaria y infantil na pública ante la presión de la concertada

El retayu afecta a ciudaes como Xixón, Uviéu o Avilés, que nun tienen caída de la población, y onde la concertada tien muchu pesu y sigue creciendo.

Na mañana del 7 de marzu celebróse una Mesa Sectorial telemática ente la Dirección Xeneral de Personal Docente, la Dirección Xeneral de Función Pública y los sindicatos que formen parte de la Mesa Sectorial d’Enseñanza Non Universitaria pa negociar les plantiyes docentes de los centros públicos pal cursu 2025-2026. La Conseyería d’Educación profundiza na operación que dende SUATEA venimos alvirtiendo fai tiempu: la vía lenta al ayusismo n’Asturies, ye decir, el progresivu esmantelamientu de la rede pública en favor de la concertada.

SUATEA yá denunciara el cursu pasáu y l’anterior, a partir de los datos que foi obteniendo de les comisiones d’escolarización, que’l 70% de les places concertaes de les Cuenques y un terciu de les d’Avilés podíen ser suprimíes pasando l’alumnáu a la pública, a coste cero. Ya entonces diximos claramente qu’esta situación yera económicamente insostenible, y solo había dos víes: suprimir unidades na concertada o facelo na pública. La Conseyería optó pola segunda, faciendo crecer el negociu priváu a costa de los servicios públicos.

Según los datos facilitaos pola responsable de la Conseyería d’Educación güei, el númberu total de puestos pal cursu que vien ye de 9.589, frente a los 9.521 del añu pasau, lo que nos indica un aumentu de 68 puestos. Esta cifra ta pendiente de que la Conseyería estudie agora les alegaciones feches güei polos sindicatos. De les feches polos centros, confírmenos que namás incorporen el 20%.

SUATEA considera que la propuesta presentada inicialmente ta bien perbaxo de les necesidaes reales de profesoráu que precisen los centros, y que tolos años compensen una migaya, más tarde y ensin negociación, con esa otra plantiya paralela illegal de “necesidaes autorizaes”. D’ehí que la plantiya orgánica nunca recueya la totalidá de los puestos docentes necesarios. Esto lleva a que una cuarta parte de la plantiya docente real nun tea incluida na plantilla orgánica, lo que condena a un mínimo de un 25% de interinidá ente’l profesoráu asturianu. 

Esti añu vuelve a llamanos l’atención la mengua grande de puestos na enseñanza básica, principalmente n’Educación Infantil (-14) y Educación Primaria (-29). Esto agudiza la tendencia de los últimos años y, anque quiera xustificase pola baxada nos nacimientos, lo cierto ye qu’esta paez que va estabilizándo, colo que la caída sistemática del númeru de docentes nun tien xustificación aparente (ver tabla).

El compromisu del Gobiernu coles etapes básiques tien de ser fundamental, porque son los pegollos del sistema educativu, de les plantilles del restu de les etapes y, en definitiva, de la supervivencia de los centros públicos. Nun se pueden zarrar unidaes d’Infantil y Primaria na Enseñanza Pública y siguir subvencionando les de los centros privaos. Nos presupuestos d’esti añu  inviértese un 2,5% más na educación concertada.

Una vez más preséntasenos una propuesta de plantiyes que, en cuenta apostar pola Escuela Pública, sigue sacrificándola, poniendo pilancos a la estabilización del personal nos centros, negando la posibilidá de más desdobles y, en definitiva, dexando al profesoráu abandonao a la hora de caltener, con muncho voluntarismu, la calidá que precisa y merez la nuestra mocedá. Con esta propuesta de plantiya nun ameyoran nin la situación llaboral del profesoráu asturianu nin la calidá educativa.