Primero lo público: el CEPA defiéndese

SUATEA condena’l doble raseru del Ayuntamientu de Siero: desaloxando’l CEPA, que lleva yá dos cursos ensin sede y ufiertando espacios a les universidaes privaes

En Siero tamos asistiendo a una decisión política que retrata con crudeza cuáles son les prioridaes del Ayuntamientu: ente que l’alcalde se muestra dispuestu a ceder suelu públicu pa les universidaes privaes, el Centru d’Educación de Persones Adultes (CEPA) foi desaloxáu ensin qu’ufiertaren una alternativa real. Resultáu: más d’un añu ensin sede, parcheando la so actividá nun espaciu amenorgáu del IES Río Nora, col perxuiciu añadíu de que’l propiu institutu pierde aules y dependencies necesaries pal so alumnáu y pal trabayu diariu.

Nun falamos de lladriyu nin de “reordenaciones”. Falamos de derechos. El CEPA nun ye un caprichu: ye una ferramienta esencial de xusticia social. Ye’l llugar onde munches persones trabayadores —y tamién persones en paru, cuidadores, migrantes, mozos y moces que tuvieron que dexar los estudios y persones mayores que quieren retomar la so formación— atopan una segunda oportunidá. Ye un serviciu públicu que combate la esclusión, ameyora la empleabilidá y dignifica la vida. El CEPA ye un pilar necesariu del ascensor social. Dexalu nel aire mientres meses, ensin un espaciu propiu y afayadizu, ye condenalu a la precariedá y unviar un mensaxe inequívocu: la educación pública estorba, la igualdá d’oportunidaes nun interesa.

Y, sicasí, lo que se pon enriba la mesa ye xusto lo contrario: regalar suelu pa que entren proyectos privaos que se presenten col envoltoriu de “universidá” pero que, en demasiaos casos, operen como negocios educativos. Y ye que la universidá, si merez esi nome, sostiénse sobre docencia de calidá, investigación, tresferencia de conocimientu y compromisu social. Cuando l’oxetivu central ye captar matrícules como quien vende un productu, lo que s’alimenta ye un modelu de mercantilización: títulos como mercancía, campus como reclamu y precariedá llaboral pal personal que sostién el tingláu.

Dende SUATEA denunciamos esta política de doble raseru: pa lo público, abandonu y recortes encubiertos; pa lo privao, facilidaes y alfombra colorada.

Por too ello, dende SUATEA esiximos:

• Allugamientu inmediatu, dignu y estable pal CEPA, con espacios abondos, accesibles y adaptaos a la so actividá.
• Compromisu presupuestariu pa garantizar el funcionamientu del CEPA en condiciones (aules, recursos, equipamientos…).
• Fin de la “solución parche” que carga sobre l’IES Río Nora una perda d’espacios que necesita pal so alumnáu y pal so proyectu educativu.
• Tresparencia total sobre cualesquier operación de cesión de suelu: criterios, condiciones, contraprestaciones ya impactu urbanísticu y educativu.
• Una apuesta clara pola educación pública como exa de cohesión social, tamién na formación de persones adultes.

Siero tien que decidir si quier ser un conceyu que cuida lo común o un conceyu que convierte lo común en moneda de cambéu. Porque cuando se desprecia un centru d’educación d’adultos, lo que se desprecia nun ye un edificiu: despreciar a la xente que lo necesita. Y esa xente tien nome y apellíos: trabayadores y trabayadores que nun pudieron terminar los sos estudios; muyeres que sostuvieron los cuidaos y vuelven formase; persones que busquen un títulu p’ameyorar el so emplegu; vecinos y vecines que quieren deprender pa vivir con más autonomía; migrantes ensin escolarizar, o que nun tuvieron la oportunidá d’escolarizase en nenguna de les llingües d’España.

La educación pública nun ye un gastu. Ye una inversión social que devuelve dignidá, oportunidaes y futuru. Lo privao, cuando entra como negociu, nun llega pa “complementar”: llega pa competir, segmentar y lucrase.

Por eso dicímoslo alto y claro: si hai suelu y hai voluntá política, primero pa lo público. Primero pal CEPA. Primero pa garantizar derechos. Y, si l’Ayuntamientu quier falar de “progresu”, que entame por nun dexar a la educación de persones adultes ensin casa.

Dende SUATEA oponémonos a la espropiación d’edificios a la enseñanza pública ente que se regala’l suelu a quien trafica con un derechu. La educación pública nun se desaloxa: defiéndese.