Pola salú y la educación, rectificación

El sindicatu SUATEA ve con esmolición grande la evolución de los acontecimientos que se vienen produciendo nel sector d’Educación. Cuando falta poco más d’un mes, atopámonos con una situación marcada por: 

1/ la falta d’instrucciones concretes pal entamu de cursu que garanticen seguridá sanitaria pal conxuntu de la comunidá escolar,

2/ pol refugu dende la Admon.  de les propuestes presentaes poles organizaciones sindicales p’amenorgar ratios y reforzar plantiyes de profesoráu. A ello hai qu’añedir la decisión catastrófica adoptada pa la convocatoria d’aspirantes a interinidá qu’afeuta al profesoráu interino

3/ la política de comunicación enquivocada de la Conseyería condució a un malestar xeneralizáu ente’l profesoráu que refuga la so actuación nestos últimos meses y siente como una falta respetu les sos últimes declaraciones nes que llega a poner en dulda la capacidá comprensiva del profesoráu.

Énte esta situación, la reacción de SUATEA foi esixir una negociación seria qu’encete los graves problemes que tenemos plantegaos. Llámanos l’atención el silenciu del Gobiernu autonómicu presidíu por Adrián Barbón que, a diferencia de la so actitú n’otros ámbitos, se caltién impasible énte l’alderique que se desenvuelve nel marcu educativu. En delles ocasiones planteguemos la necesidá de reforzar el presupuestu n’Educación pa evitar males mayores nel supuestu de que los centros educativos se conviertan en llugares d’andada. El so silenciu vien a señalar la so falta de compromisu cola Escuela Pública Asturiana.

A too esto habría qu’añader la esistencia d’una guerra interna ente la Conseyería y aquelles organizaciones sindicales acostumaes a tener les puertes abiertes en llexislatures anteriores pa influyir en tomar de decisiones.  En mediu del malestar señalao ente’l profesoráu, dellos sindicatos preséntense agora pidiendo la dimisión de la Conseyera adoptando un tonu populista que supón un xiru sorprendente nes sos actitúes frente a la sumisión cola qu’actuaben en períodos anteriores. 

SUATEA busca soluciones inmediates a toos estos graves problemes. Queda un mes pal entamu de cursu y creemos qu’hai que resolver el problema del personal interino. Ayeri falemos con Conseyería y güei unviemos una propuesta a la Xunta de Personal sobre la posibilidá de dos convocatories distintes d’axudicación  de vacantes d’interinidá pa evitar que puedan perxudicase los sos intereses.

Tamos tovía a tiempu pa resolver esta situación. Por ello proponemos

1/ Aportunar énte la Conseyería pa pidir l’amenorgamientu de ratios y reforzamientu de plantiyes porque siguimos pensando que ye lo correcto si queremos evitar el riesgu de contaxu. Igualmente ye menester unes instrucciones clares y precises d’actuación.

2/ Resolver de forma favoratible al profesoráu interino el conflictu surdíu col pidimientu qu’acabó esta selmana y l’anunciada pola Conseyera en see parlamentaria. Esto dexaría empecipiar el cursu coles plantiyes más  completes nos centros.

3/ Esixir un compromisu claru del Gobiernu autónomu asturianu cola Escuela Pública y una rectificación inmediata per parte de la Conseyera d’Educación de les últimes declaraciones que fizo nes que punxo en dulda la capacidá comprensiva del profesoráu.

4/ Plantegar l’entamu de contautos col restu d’organizaciones sindicales pa convocar movilizaciones y fuelga coincidiendo col entamu de cursu, esixendo les rectificaciones que puedan corresponder, incluyíes dimisiones de quien nos llevaron a esta situación. Queremos pensar qu’entá tamos a tiempu d’enderechar esta complexa situación.

Uviéu 28 de xunetu 2020