¡ POLA ESCUELA PÚBLICA !

Otra vez, dende SUATEA, CCOO, UXT y CSIF convocamos a tol profesoráu y a la sociedá asturiana en xeneral a otra manifestación pal día 31 de mayu, para pidir a la Conseyería d’Educación del Principáu d’Asturies que convoque a les OOSS y empecipiar unes negociaciones que son más necesaries que nunca si queremos ameyorar la educación pública asturiana.

Ye llamentable, que col ésitu de l’anterior manifestación, el Gobiernu d’Asturies sigua ensin dar a la educación pública la importancia nin los fondos que merez mientres avanza nel so apueste por sovencionar con dineru público la enseñanza privada al traviés de los conciertos educativos.

Como tamos viendo, la Conseyera sigue atrincherada na política educativa del artificiu, del marketing, d’anuncies, de semeyes ensin conteníu y de xuntes ensin compromisos. El Gobiernu del Principáu sigue ensin entender que’l dineru dedicao a la educación pública ye una inversión xusta, necesaria y rentable y que’l tiempu de les palabres vacies y la comedia de les xuntes ensin conteníu nin presupuestu acabóse. Insistimos que les restricciones presupuestaries nun pueden sirvir siempre de disculpa pa nun cumplir colo que se prometió, sobremanera, cuando namás s’apliquen a Educación.

Les organizaciones convocantes aspiramos lexítimamente a que la educación pública asturiana asiente los pegollos d’un progresu social cohesionáu qu’afite los principios d’igualdá d’oportunidaes y xusticia social, y vamos siguir trabayando pa que la nuestra enseñanza pública non solo tresmita conocimientos académicos, sinón que contribuya amás a la formación de ciudadanes y ciudadanos críticos y comprometíos col bien común. Porque la educación pública asturiana ye una cuestión de toos y de toes.

Como yá saben, la comunidá educativa fizo  tou esti cursu escolar una serie de movilizaciones, reivindicando un procesu de negociación p’algamar compromisos qu’ameyoren la enseñanza pública asturiana; la postrera d’elles, la manifestación que se fizo’l día 27 d’abril y qu’axuntó n’Uviéu a miles de persones esmolecíes pola educación y pol deterioru al que’l Gobiernu asturianu la ta llevando.

Por eso pidimos:

• Un alcuerdu nuevu de plantiyes que dea a los centros los recursos humanos necesarios, que permita que tol profesoráu tea nel so centru dende’l 1 de setiembre, que ponga fin a les medies xornaes y qu’amenorgue’l númberu d’alumnos y alumnes nes aules. L’Alministración sigue ensin encarar un problema estructural ya incumple la llei, porque en nengún casu va baxar la tasa d’interinidá al 8%.

• La mengua de la burocracia pa disponer de más tiempu pa la docencia, la innovación y la investigación. La reducción de la carga llectiva pa disponer de más tiempu p’acciones imprescindibles nel ámbitu educativu como l’acción tutorial y la coordinación, y siguir avanzando nuna atención más individualizada, tal como esixe la LOMLOE y como ratificó’l Conseyu Escolar del Estáu.

•  La implantación del ciclu de 0 a 3 años con una xestión totalmente pública, ensin concertación y de baldre y calter educativu y, por tanto, la so plena inclusión na Conseyería d’Educación. El proyectu clave de la llexislatura va camín de quedar en nada porque siguen ensin resolvese les cuestiones llaborales y la organización de les escueles; eso que la Conseyera denominó “trabayu finu” y que toos y toes sabemos que ye lo principal y la clave del ésitu de la midida, porque nada va salir bien empeorándose les condiciones llaborales de les trabayadores.

•  Dotación a los centros públicos de los recursos necesarios pa que sían espacios seguros y saludables.

•  Un programa de formación permanente del profesoráu dientro del horariu llectivu pa poder encarar los retos educativos del sieglu XXI nes meyores condiciones posibles.

Pidimos, a última hora, la dignificación del oficiu docente. Que se reconoza la profesionalidá y el bon desempeñu del profesoráu asturianu que, inaceptablemente, ye’l peor pagáu del país. Ye hora d’acabar con ataques absurdos y inxustificaos qu’estropien la so imaxe y la so valía y llograr una reconocencia real, efectiva y acordies cola responsabilidá del oficiu docente.

Y más tovía:

1.  Recuperar les cocines de proximidá nos centros que nun les tienen y qu’usen nesti momentu llinies de fríu que son un fracasu a la hora alimentar a los nuestros escolinos. Queremos que tol alumnáu asturiano tenga accesu a un menú de verdá sostenible, saludable y afayadizu a les sos necesidaes y el so desenvolvimientu evolutivu.

2.  Que tol alumnáu de la escuela pública tenga comedor dende l’entamu del cursu y hasta finales de xunu, evitando asina les diferencies sociales por razón del códigu postal o por quien se responsabiliza d’esti serviciu.

3. Ameyorar les beques y establecer criterios comunes en toles alministraciones, teniendo en cuenta los rangos económicos y el númberu de miembros de la unidá familiar independientemente del presupuestu que se destine dende cada alministración y a qué vayan destinaes, realizando un aprovechamientu d’elles real y efectivu pal alumnáu.

La respuesta de la Conseyera d’Educación foi hasta agora’l nun comprometese en nada que tuviera una inversión económica. Les reclamaciones sindicales, en cuenta resolvese, siguen presentes y hasta apaecieron problemes nuevos onde nun los había, como nel serviciu d’inspección, los Centros de Profesores y Recursos, el tresporte y los comedores escolares. El Gobiernu asturianu dedícase a vender fumu y a apuntase méritos que nun-y correspuenden, pos les reconocencies del alumnáu de la enseñanza pública pertenecen a los y les estudiantes, al profesoráu y a les sos families.

Les necesidaes de la escuela pública siguen ensin cubrise mientres se destinen nos presupuestos d’anguaño 105 millones d’euros pa siguir calteneiendo’l negociu de la rede privada-sovencionada. P’ameyorar la educación pública necesítase dotala de medios económicos, humanos y materiales abondo, y esta inversión tien que tener continuidá y garantizar el serviciu más allá de les aportaciones estraordinaries procedentes de los fondos europeos.

Sra. Conseyera, repitímos-y que la educación pública ye un derechu fundamental y un pegollu básicu del bientar. La educación pública tien de ser un apueste prioritariu porque ye la única que garantiza al alumnáu y a les families oportunidaes y resultaos n’igualdá. Y los responsables políticos como usté tán pa cumplir los sos propios programes electorales y solucionar problemes, non pa crear otros nuevos. De nun ser capaces de cumplir eses premises lo que tien que faer ye dimitir.

Por too esto, y énte la falta de diálogu y compromisos, inclusive a pesar del avisu que se dio’l día 27, convocamos otra vez  una manifestación a la que convidamos a tola comunidá educativa asturiana en defensa de la enseñanza pública y que va ser precedida d’un encierru que va escomencipiar la tarde anterior nel CP Buenavista II d’Uviéu.