Oponémonos al incrementu de la carga burocrática del profesoráu asturiano

Esta entrada está disponible en: Castellano (Castellanu)

El profesoráu asturiano queremos espresar la nuestra disconformidá cola cada vez mayor carga burocrática que ta invadiendo’l llabor docente y entorgando enormemente’l desempeñu de la nuestra profesión. D’otra manera, les nueves xeres dixitales y les comunicaciones telemátiques que cada día son más multipliquen el tiempu destináu a la xestión sin qu’esista nenguna regulación pa que la desconexón dixital seya factible. Por último, a estes altures del procesu de concreción curricular LOMLOE yá podemos testimoniar que’l sistema nuevu d’evaluación nun ye prácticu nin efectivu a la hora de calificar al alumnáu. El profesoráu vese obligáu a echar munches d’hores en rellenar tables, sacando porcentaxes a una montonera actividaes y prebes. Amás, ye difícil esplicar el resultáu d’esti procesu d’evaluación al alumnáu y a les families. 

Anguaño, los y les profesores asturianes vémonos obligaes a dedicar gran parte del nuestru tiempu de trabayu a xeres alministratives. La consecuencia d’esta sobrecarga burocrática ye que tenemos que desempeñar funciones que nun aporten nada al procesu d’enseñanza-aprendizaxe, a costa de les que de verdá sirven pa meyorar el procesu, como por exemplu la preparación d’actividaes motivadores pa les nuestres clases, l’atención a les diferencies individuales, l’acción tutorial, o los planes de recuperación y refuerzu, y, en xeneral, tolo que nos permita formar persones crítiques, responsables y llibres. 

Por too esto, demandamos que:

1. El trabayu del profesoráu se centre na xera pedagóxica y docente, que ye lo suyo, y que nun queden tapecíes por cuenta la cantidá de xestiones burocrátiques qu’hai que facer.

2. El procesu d’evaluación pueda servir verdaderamente como fonte d’información útil pa meyorar l’aprendizaxe del alumnáu y que permita que les families participen de forma efectiva nesti procesu.

3. Se regule l’usu de les nueves tecnoloxíes pa l’atención al alumnáu, a les families y al centru escolar, que permita la desconexón dixital del profesoráu fuera la so xornada llaboral. 

¿Échesnos un gabitu firmando y compartiendo?
https://chng.it/nJFtqx4pTq

Print Friendly, PDF & Email

Esta entrada está disponible en: Castellano (Castellanu)