SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
El señor Conseyeru Genaro Alonso acaba de declarar que “ye habitual” empezar cada cursu con problemes de personal p’atender les necesidaes docentes de los centros educativos.
Esta afirmación, magar reconoz los problemes que de manera repitida sufre la educación asturiana cada mes de setiembre, supón tamién “normalizar” una situación que n’absolutu podemos almitir como normal. “Lo habitual” tendría de ser qu’alumnos y alumnes tengan al docente delantre cuando empiecen les clases, nun ye muncho pidir a los nuesos responsables, especialmente teniendo en cuenta l’esfuerzu que s’esixe al profesoráu tres el deterioru de les condiciones llaborales estos últimos años.
Esixir que l’alumnáu tenga al profesor o profesora que correspuende na aula cuando empiecen les clases nun tendría de ser una reivindicación, ye una responsabilidá ineludible de l’alministración que n’Asturies nun paez que merezamos que se cumpla.
Nun ye de recibu que s’escuden nos plazos de la matrícula de los ciclos formativos de formación profesional, eso ye solo una pequena parte de los defectos de personal que presenten los centros. Nes escueles d’Educación Infantil, Primaria, Secundaria y Bachilleratu, los grupos conócense con abonda antelación y ye onde más problemes se tán dando pa poder entamar les primeres selmanes de clases. Nun hai sides válides pa nun tener sustitutos para les xubilaciones que se conocen con trés meses enantes, pa les baxes yá previstes, pa les places qu’hai que cubrir de persones con cargos públicos (como la de dalgún diputáu que lleva años de representante nel parlamentu asturianu), pa los representantes sindicales que dieron los sos datos en xunu, pa les unidaes que fueron ampliaes poles matrícules, p’atender a última hora, les demandes que dende les direcciones de los centros vienen faciéndose yá enantes de les vacaciones braniegues.
Esta neglixencia tien amás otru agravante: l’ausencia de nueva convocatoria de profesoráu interín hasta’l 18 setiembre. Ye inadmitible que nun se realice con anterioridá al empiezu de les clases la contratación del profesoráu necesariu pa evitar les ausencies de personal a lo llargo les dos selmanes que va tar l’alumnáu nes aules enantes de les incorporaciones previstes pal día 25. La Conseyería pue y tien de solucionar esta situación, nun hai más esplicación que’l puru aforru económico pa xustificar esta demoranza vergonzosa.
Poro, dende SUATEA, esiximos al señor conseyeru:
- Qu’adelantre la siguiente convocatoria de profesoráu interino una selmana pa embrivir los perxuicios causaos al alumnáu y al profesoráu.
- Que se cubran toles necesidaes de personal de los centros entainando al máximo .
- Que nos próximos cursos los centros cunten con tol personal necesario p’atender al alumnáu dende l’empiezu de les clases.
El secretariáu de SUATEA
N’Uviéu a 5 de setiembre de 2017
Esta entrada está disponible en: Castellano (Castellanu)
