Nuevu retayu de plantiyes

Nuevu retayu de plantiyes, l’esmantelamientu del sistema educativu asturianu sigue un cursu más

Otra vuelta la Conseyería actúa a escondidielles y de forma trapacera facilitando a los centros educativos la propuesta de plantiyes pal próximu cursu el vienres a última hora, acabando’l plazu d’alegaciones güei martes a les 14:00 hores. Asina, el llunes pela mañana les direcciones de los centros atópense ensin capacidá de reacción pa estudiar en tientes les necesidaes del so centru y alegar, correctamente, a la propuesta de l’Alministración. Estes son les formes qu’usa l’Alministración de forma continua y qu’ellos mesmos definen como eficientes y amañoses.

Esta premura quier torgar qu’hebia alegaciones, per parte de los centros, al nuevu hachazu en profesoráu que van sufrir de cara al cursu que vien. A media mañana nel nuestru corréu lletrónico ya recibiéremos copia de les alegaciones presentaes por más d’un 20% de los centros públicos asturianos que tán en desalcuerdu cola Alministración na propuesta de plantiyes.

Nesta propuesta de plantiyes preténdese poner en marcha un concursu de tresllaos paralelu pa cubrir les places billingües que conculca los derechos de tol profesoráu, yá que al nun haber una normativa autonómica qu’organice estos programas táyase la posibilidá de movilidá del concursu del profesoráu dexando n’indefensión tanto al profesoráu que participó nel concursu de tresllaos como’l que ta nos centros. Esta propuesta ta xenerando una gran molición ente’l conxuntu del profesoráu que ve como otra vuelta se vulneren los sos derechos fundamentales.

Otru añu, tamos falando de decenes de puestos de trabayu destruyíos por un gobierno que se llava la cara posando pa la semeya en defensa de los trabayadores d’empreses privaes que, desgraciadamente, vemos como piesllen les sos puertes na nuestra Comunidá, ente otres razones gracies a la pasividá del propiu Gobiernu. Mentanto, cursu tres cursu achuquinen decenes de puestos de trabayu en daqué tan fundamental pal desarrollu d’un país como ye la educación pública.

Frente a esta destrucción de puestos de trabayu nes plantiyes, con un llaváu de cara paralelu, tenemos a la Conseyera d’Educación enfotada en convocar una ufierta d’empléu públicu absurda por ser d’especialidaes que nun van convocase en nenguna otra comunidá autónoma y ridícula pol númberu de places.

L’avalancha de persones que llegarán d’otres comunidaes autónomes ta  garantizada yá qu’Asturies ye la única  comunidá  que  convoca oposiciones de  FP;  esto va facer  que’el coste  d’esti procesu seya desproporcionáu. Pa  ello será necesario desviar cientos  de  miles d’euros destinaos a cubrir necesidaes básiques existentes na mayoría de centros docentes a un procesu que nun meyora en nada’l sistema educativu asturianu, dao que la ufierta nun  cubre nin una mínima parte de les xubilaciones que se dieron nestos años.

Pa ello amosamos debaxo el cuadru de xubilaciones dende los años 2003 al 2013 frente a los puestos ufiertaos d’empléu públicu.  Del estudiu sácase que nos últimos 10 años diéronse 3808 xubilaciones docentes frente una ufierta d’empléu de 1296 places,  por contra nel mesmu periodu xubió l’alumnáu  matriculáu en centros públicos  en 3475. Esto ye, más alumnáu y menos profesoráu, esta ye la realidá de la política que pretende apaecer como antagónica a los Gobiernos del PP cuando en realidaá ta aplicando les mesmes polítiques económiques y sociales.