Nota prensa: Procesu d’estabilización

El xueves 19 de mayu pela mañana, publicóse finalmente’l resultaú de les negociaciones calteníes na Mesa Xeneral de Función Pública so la ufierta d’empléu y el procesu d’estabilización del personal interino. Dende SUATEA tenemos que señalar la nuesa fonda decepción pola resultancia final del procesu. Yá diximos nel so momentu, que nun yera lo que vinimos reclamando con enfotu qu’esti procesu d’estabilización yera una puerta abierta pa poder afitar a una parte sustancial de la plantiya, empezando por quien lleven careciendo l’abusu de contratación precaria dellos años, cuando non décades.

El nuesu enfotu nel últimu períodu llogró romper Alcuerdos como l’Icetazu, obligó a volver axustar el procesu nel Parlamentu antes de convertise en Llei. Pero la concreción de too esto vien resolviéndose en cada comunidá autónoma, dando a lo último resultaos dafechu desemeyaos si se comparen les places que se van a convocar. Nel casu d’Asturies, atopamos con unos sindicatos del ámbitu docente que nunca apostaron pola estabilización del personal interino al traviés del concursu de méritos. Enfotaos en que la única vía ye la oposición, a la fin, atopamos con una mísera reserva de 234 places pa concursu de méritos y 1328 pal concursu-oposición, que se correspuenden coles places que la mesma Conseyería nun convocó n’oposiciones anteriores. Un datu sosprendente si se compara colos que salen del ámbitu sanitariu onde 4463 places son pa méritos y 307 pal concursu oposición.

Mientres tou esti tiempu, la Conseyería xugó un papel nefastu. Faciendo desdexación de les sos funciones nun fixo un mínimu esfuerzu por convocar una Mesa Sectorial na qu’axustar les oposiciones nel ámbitu d’Enseñanza. Nel so llugar, suplantando la negociación, dio en crear una comisión técnica na Mesa Xeneral que-y dexaba tornar la presencia de SUATEA, única organización sindical dispuesta a defender un procesu d’estabilización distintu. Llámenlo democracia pero nun ye. Trátase de maniobres típiques de burócrates.

Dende SUATEA, en realizando una busca nes dos primeres convocatories d’interinidá de los cursos 15/16 hasta’l 20/21, atopemos 317 places que, según la disposición adicional sesta (places vacantes que se repiten nel mesmu centru añu tres d’añu dende antes de 2016), tienen de dir al concursu de méritos, frente a les 125 ufiertaes pola Alministración pa cumplir los requerimientos d’esa disposición. A estes, hai que sumar les que vienen de la disposición adicional octava (places de naturaleza estructural ocupaes por personal interino dende antes de 2016) que, según los datos que salieron a la lluz na última negociación, paez ser que quedaron en 109. Esta ye una cifra risible cuando, solo sumando les especialidaes de filosofía, xeografía y hestoria, y maestros d’educación física, yá prácticamente llegamos a esa cifra (83). Según estimaciones de SUATEA, el númberu de places a estabilizar por concursu de resultes de la disposición octava nun ye inferior a 700. Poro, pal concursu de méritos tendríen d’ufiertase non menos de 1 000 places (sumando les 317 de la disposición sesta coles non menos de 700 de la octava), frente a les 234 qu’ufierta l’Alministración. Per otru llau, pa cumplir el requisitu d’amenorgar la interinidá per debaxo del 8%, habría que sacar, siquier otres 600 places pal concursu-oposición. Y tou ello si a cencielles pretende llegase al 8% d’interinidá, col riesgu de que, cola xubilación de profesores de la xeneración del baby boom, en menos de 2 años yá podamos doblar esi 8%. Pa garantizar, tal como la mesma llei s’ autoimpón, que nunca se supere esi 8% d’interinidá, hai que sacar a concursu-oposición, a lo menos, otres 1 300. Falamos d’una ufierta de 2300 places, 1000 a concursu y 1 300 a concursu-oposición, frente a la ruina ufierta de 1562 places en total (234 a concursu y 1328 a oposición). A estes, inda faltaría sumar les correspondientes a la tasa de reposición (les que compensen les xubilación que se van xenerando), que diríen a concurso-oposición por aciu’l procesu ordinariu.

A última hora, tamos énte una Ufierta d’Empléu d’en redol a 8500 places, de les que 4700, bien desglosadas van dir a Sanidá, 4500 d’elles a méritos, frente a les 1500 places n’Enseñanza, de les cualos 234 son acutaes pa méritos. Ensin dala dulda, llama l’atención esa fuerte desproporción, máxime si comparamos les plantiyes autonómiques de dambos sectores, abondo pareyes. Nun dexa de resultar sorprendente la defensa de puestos que faen unos sindicatos nel ámbitu sanitariu, frente a l’actitú refalfiona nel sector docente.

Ante esta situación, daqué se supónque tendría de dicir la Conseyería nel so descargu énte lo que paez una falta manifiesta d’atención al procesu d’estabilización y la so poca voluntá de defender el so pesu políticu y el so significáu dientro d’un proyectu que se reclama d’esquierda.

Estáu de convocatories autonómiques hasta’l momentu:

El Secretariáu de SUATEA

Uviéu, 19 de mayu de 2022