N’Asturies más razones que nunca pa dir a la Fuelga

N’Asturies más razones que nunca pa dir a la Fuelga:

El próximu 9 de marzu hai convocada Fuelga Xeneral na enseñanza en tolos niveles educativos. Los retayos brutales que sufrió’l sector devaluaron y degradaron les condiciones llaborales del profesoráu y les d’escolarización del alumnáu. La implantación de la LOMCE agravó esta situación y asina lo tamos esperimentando nos últimos años. Les amenaces del Ministeriu d’Educación (endurecer l’accesu a la función docente, el despidu de miles d’interinos y l’implantación del pagu por oxetivos, como indica Marcial Marín, númberu dos del Ministeriu) acúrriense sobre la subcomisión d’Educación qu’aborda’l llamáu Pactu Educativu ensin faer referencia dalguna a los retayos, dando’l llombu al profesoráu, y dexando’l so futuru dependiendo d’un esmolecedor Estatutu Docente.

N’Asturies, la Conseyería d’Educación, en cuenta de resistise a l’aplicación d’estes midíes, amosóse como l’avanzadura del gobiernu central. El tratu dau al profesoráu y al sistema educativu basóse nel incumplimientu de los alcuerdos en vigor, l’amenorgamientu de plantiyes, la medría de los horarios (qu’otres CCAA yá amenorgaron por aciu d’alcuerdos), el zarru d’aules públiques mientres se caltienen conciertos cola enseñanza privada, la celebración de reválides mientres n’otres CCAA resálvense, l’endurecimientu de la EBAU  complicando la posición del alumnáu que cursa Bachilleratu, la devaluación de les enseñances de réxime especial, el despreciu escontra l’atención a la diversidá, la falta de respetu al profesoráu itinerante, la inestabilidá y precariedá del profesoráu interín, que ta nuna situación d’incertidume intolerable.

Por ello esta fuelga tien que marcar un puntu d’inflexón na nuesa comunidá. Tien que suponer un aldabazu frente a les polítiques educatives estatales, pero tamién contra’l despreciu que la Conseyería d’Educación amuesa escontra’l so profesoráu. Ye hora d’esixir el fin de los retayos y de pidir la negociación inmediata d’un alcuerdu de meyora de les condiciones llaborales del profesoráu, que suponga ente otres coses les siguientes:

• Amenorgamientu del horariu lectivu pa tol profesoráu. Vuelta inmediata a les 18 hores lectives en Secundaria.
• Estabilidá pal profesoráu interín hasta l’accesu a la función pública. Non a la precarización que supon la proliferación de medies xornaes.
• Recuperación del poder adquisitivu perdíu, lo mesmo que de los derechos a tar enfermu ensin descuentos
• Reducción horaria pal profesoráu mayor de 55 años ensin amenorga económica.

Por ello’l 9 de marzu tien que ser una fecha que marque la movilización del profesoráu y del restu de la comunidá educativa pa evitar que Asturies siga tando a lo cabero en condiciones llaborales del so profesoráu y dexe de ser una alumna aventayada na aplicación de la LOMCE.

TOES Y TOOS A LA FUELGA EL DIA 9 DE MARZU

CONTRA LA LOMCE Y POR LA INMEDIATA MEYORA DE LES NUESES CONDICIONES LLABORALES