Mesa Sectorial: Procesu ¿d’ESTABILIZACIÓN?

EL MECD APUESTA NAMÁS POR CALTENER EL RD 276/2007 CON LLIXEROS CAMBEOS NA FASE DE CONCURSU

 SUATEA y los STEs-i alvierten d’un ERE masivu y la mayoría de la representación sindical esixe un sistema d’accesu transitoriu ya escepcional

 Depués de cuatro meses de que se ficiera la primer mesa sectorial pa negociar l’aplicación del Alcuerdu pa la Meyora l’Empléu Públicu, güei celebróse  la segunda xunta de la mesa –cola presencia d’una representante de SUATEA- pa empecipiar a concretar los términos de la negociación, que siguirá’l próximu 7 payares.

Pola información del MECD procedente de les alministraciones autonómiques, mui parcial ya incompleta, so los criterios pa determinar les places que van ser oxetu de les próximes convocatories, faise evidente la disparidá metodolóxica que les Comunidaes Autónomes tán aplicando nos sos ámbitos educativos respeutivos. SUATEA y STEs-i esiximos que yera necesario unificar esos criterios y coordinar les futures convocatories nos diferentes territorios, pero a estes altures constatamos el desinterés p’alcordar la homoxeneidá necesaria  nos criterios  de les CCAA y tamién el períodu pa la   so execución: la propuesta anicial del Ministeriu, qu’apoyemos la mayoría de les organizaciones sindicales,  el realizales al traviés de tres ufiertes de emplegu públicu (2017-2019) y executales en cinco convocatories (2018-2022) nun se ta siguiendo en delles CCAA.

Lo más esmolecedor de los temes trataos foi lo rellacionao col sistema d’ingresu na función pública docente. El MECD, como yá afirmara na mesa de xunu, pretende caltener el RD 276/2007  que ta n’usu anguaño, con un retoque parcial del baremu de la fase de concursu na valoración de la esperiencia docente. La mayoría sindical presente na mesa defendimos que tamos ante una situación estraordinaria y ello requier actuaciones estraordinaries. Nesti sen, diximos que defendemos como modelu ordinariu, l’accesu estremáu o l’afitamientu al traviés del art. 61.6 del EBEP.

Sicasí, daes les llendes impuestes pa la negociación nesta mesa sectorial y la situación escepcional que se da pola aplicación del Alcuerdu pa la meyora del emplegu públicu de 29 de marzu y los Presupuestos Xenerales del Estáu de 2017, entendemos qu’el RD 276/2007 nun val pal oxetivu que se pretende.  Pa SUATEA y STEs-i, l’amenorgamientu de la tasa d’interinidá al 8 % nun puede suponer de denguna manera un ERE masivu na Educación pública. Demandamos negociar y buscar les meyores opciones pa que’l profesoráu interino consolide’l so puestu de trabayu y, pa ello, defendemos que, amás d’incrementar el valor la esperiencia docente, tienen d’ameyorase siquier otros aspeutos:

Fase d’oposición:

1. Non a les pruebes eliminatories.
2. Incrementar el númberu de temes pa escoyer.
3. Eliminación del exerciciu prácticu de les especialidaes (como asocedió nes OEP transitories LOGSE y LOE)
4. Prácticos rellacionaos cola práctica docente y la competencia didáctica.

Fase de concursu:

1. Mayor valoración de la esperiencia docente hasta les llendes llegales permitíes y medría del tiempu de servicios computable.
2. Incrementar la ponderación de la fase de concursu hasta’l máximu llegal permitíu.
3. Revisar la equivalencia de titulaciones.

Pa la calidá educativa y en defensa de los derechos llaborales, SUATEA y los STEs requerimos tamién a les alministraciones educatives autonómiques que defendan ante’l MECD la necesidá d’un sistema d’ingresu escepcional que permita l’afitamientu nel emplegu del profesoráu interino y tamién dao que’l MECD se  xustifica na postura que tienen les CCAA de nun camudar el RD 267/2007 sobre too no tocante a les pruebes non eliminatories, dende SUATEA instamos a l’Alministración educativa asturiana a defender na Comisión d’Educación  del próximu llunes 30 d’ochobre la modificación d’esti RD.

Amás, SUATEA y STEs-i apostamos tamién pola unidá sindical pa consiguir estos oxetivos y vamos recurrir a la movilización que’l profesoráu interino demanda si les alministraciones y el Ministeriu d’Educación siguen ensin dar una respuesta afayadiza a toes estes demandes.

Secretariáu de SUATEA 26 d’ochobre de 2017