Manifiestu Europa Laica

MANIFIESTU POLA DEROGACIÓN DE LOS ALCUERDOS COLA SANTA SEDE (HACIA UN ESTÁU LAICU)

Creyimos qu’un gobiernu de vocación progresista abriría la puerta a reformes fondes. Sicasí, ente sofitos fráxiles y el resurdir de vieyos reaccionarismos, eses tresformaciones nun llegaron o quedaron a mediu camín.

El tiempu de les disculpes terminó. Lo que queda de llexislatura tien de ser tiempu de valentía.

En plenu sieglu XXI, España caltién un Concordatu cola Santa Sede so la denominación d’Alcuerdos de 1976 y 1979. Un tratáu que consagra privilexos pal catolicismu y erosiona la llibertá de conciencia de la ciudadanía. Que los fondos públicos sigan financiando al cleru ye un anacronismu. Que miles de millones d’euros sostengan colexos católicos y l’adoctrinamientu relixosu nes aules ye una anomalía democrática. Que les nueses lleis educatives, fiscales y tributaries tean condicionaes por alcuerdos internacionales col Vaticanu ye una distorsión de la soberanía popular.

Los concordatos nun son preseos neutros. Fueron, históricamente, ferramientes de blindaxe institucional en réximes autoritarios como los de Hitler, Mussolini, Franco o Salazar. Nun ye casualidá.

Los grupos parllamentarios que güei caltienen al Gobiernu defendieron nos sos programes la necesidá de derogar estos alcuerdos. Tamién el Parllamentu lo tien reclamao en llexislatures anteriores.

Nun puede falase d’una verdadera reforma educativa mientres esti Concordatu siga vixente.

Nun puede garantizase dafechu la llibertá de conciencia mientres esistan privilexos xurídicamente blindaos.

Nun puede construyise un Estáu verdaderamente democráticu con una esceición confesional encazada na so arquitectura llegal.

Los Alcuerdos de 1976 y 1979 son la última trinchera xurídica de los privilexos eclesiásticos. Y toa trinchera puede desmontase.

Por too ello, les asociaciones y persones firmantes esiximos al Gobiernu que cumpla los sos compromisos electorales y entame de momentu los trámites pa la denuncia y derogación de los Alcuerdos cola Santa Sede.

España tien de dar un pasu adelantre.

Tien de zarrar definitivamente una herencia del franquismu que yá nun representa a una sociedá plural, diversa y madura. Nun pidimos privilexos pa naide. Pidimos igualdá. Pidimos neutralidá institucional. Pidimos llibertá de conciencia real pa toles persones, crean lo que crean o dexen de creer.

La oportunidá esiste. La responsabilidá tamién. Yá nun hai escuses.

Puedes roblar el manifiestu entrando nel enllaz: https://laicismo.org/mas-de-40-organizaciones-y-100-personalidades-firman-un-manifiesto-por-la-derogacion-de-los-acuerdos-con-la-santa-sede/

Videu esplicativu: https://www.youtube.com/watch?v=rA0I9NIaQtU