Manifiestu de l’asamblea de profesoráu interín

Aconceyaos n’asamblea nel IES “Aramo” d’Uviéu el llunes, 18 de xineru de 2016, el profesoráu interín de los centros públicos asturianos quier facer públicu esti MANIFIESTU:

• N’aplicación del nefastu Alcuerdu de profesoráu interín suscritu por FETE-UGT y ANPE en 2014, la convocatoria d’oposiciones prevista pa esti añu va trayer la reordenación y rebaremación de les llistes d’interinidá actualmente en vigor, lo que pue implicar qu’una parte grande de los docentes interinos que lleva abondos años exerciendo, pierda’l trabayu.

• En munches CCAA, el profesoráu interín tien firmaos pautos d’estabilidá, de manera tala que les convocatories d’oposiciones nun-yos afecten, al tar estremaes de la recomposición de lllistes. Poro, paeznos ineludible arreyar la convocatoria de oposiciones y la negociación d’otru Alcuerdu nuevu de profesoráu interín qu’otorgue estabilidá a los que, acreditando esperiencia docente, nun algamen plaza. Nesti mesma llinia d’estabilidá, delles CCAA miren polos interinos mayores de 55 años faciéndo-yos un contratu indefiníu hasta la xubilación, polo que ye posible y de xusticia que los interinos asturianos tengan igualdá de condiciones.

• No tocante a la convocatoria d’oposiciones, demandamos que s’asoleye a la mayor brevedá posible el desglose de les places por especialidaes. Asturies ye una de les últimes Comunidaes en facelo público. Esta asamblea denuncia tamién la situación de discriminación na que sigue’l profesoráu de llingua asturiana, qu’otra vez más vese escluyío del procesu. D’igual manera, señalamos lo absurdo y contraproducente que ye convocar especialidaes nes que la ufierta de places ye insignificante.

• Sobre’l procesu d’oposiciones, esiximos que se meyoren otros aspectos que criaron inseguridá n’otros procesos selectivos anteriores: tresparencia a lo llargo de tol procesu, publicación de los criterios de calificación de toles partes de la oposición, garantíes nel anonimatu de los aspirantes, sortéu únicu de temes pa tolos tribunales, revisión y reclamación delantre’l tribunal al final de cada prueba y actualización de la prueba práctica.

• Per otra parte, constatando que munchos partíos políticos vienen faciendo apocayá propuestes pa incluyir una especie de “MIR educativu” darréu del sistema d’accesu a la función pública docente, queremos mostrar la nuestra oposición dafechu a ello.

• Nesti sen, y en viendo que paez que s’abre un períodu de debate y reconsideración de les formes d’esti accesu, cuidamos que ye urxente y necesario que, amás d’afitar mecanismos d’estabilidá dientro de la llegalidá vixente, y faciendo usu del marxe d’autonomía del que dispón, la Conseyería d’Educación asturiana reclame y negocie un sistema xustu d’accesu onde la esperiencia se valore más afechiscamente y nun s’atienda a criterios esclusivamente economicistes, sinon de calidá educativa a la hora d’entamar les convocatories d’empléu.

N’Uviéu, a 19 de xineru de 2016