Manifiestu de la OM de Stes nel día internacional contra la violencia hacia les muyeres 25P

Anguaño, con un númberu elevadísimu de muyeres víctimes de violencia machista, nun queremos entrar en si esta muyer o la otra computa nes estadístiques. Eso nun ye lo principal, porque con qu’haya una sola muyer asesinada por terrorismu machista, yá son munches, ¡demasiaes!
El nuesu manifiestu ye un alegatu por toes y cada una de les muyeres asesinaes. Porque por muncho que los medios de comunicación s’esfuercen n’esleir la magnitú del terrorismu machista, queremos dexar claro que les muyeres nun muerren, son ASESINAES por HOMES nun actu de violencia.
Altes, baxes, rubies, morenes, españoles, estranxeres, de clase alta, media, baxa, nueves, mayores,… Toes distintes, pero toes con un denominador común, un asesín que les consideraba oxetu de la so propiedá y que cree que pue disponer de la so vida al so antoxu.
Queremos denunciar esta sociedá que dientro d’una cultura patriarcal, mira pa otru llau y dexa que se produzan casos de violencia, porque “son engarradielles de pareya y nun se debe entemeter nos problemes de los demás”. ¡Abasta yá! El terrorismu machista ye un problema de toes y toos, la sociedá tien de tomar una postura batallosa énte tou actu de violencia machista y nun dexar nin un casu más.
Esiximos a les Alministraciones públiques qu’intervengan de manera rápida, eficaz y contundente énte’l maltratador. Que ponga a disposición de les víctimes tolos recursos necesarios pa ayudar a superar esta situación de violencia que les arrodia; y asina torgar casos como’l de Sara Caleya, que se suicidó énte la ineficacia y lentitú de la xusticia o’l casu de la muyer canaria que dempués de refuga-y la orde d’alloñamientu del so ex-home foi asesinada por ésti.
Demandamos que se tomen midíes preventives, tantu nel planu educativu, porque les nueses fíes tienen derechu a vivir una vida ensin violencia, como nel lexislativu, porque tienen derechu a ser protexíes contra tou tipu de violencia. Asina mesmo reclamamos que s’aumente la dotación presupuestaria pa l’asistencia y recuperación de les muyeres maltrataes y de les sos fíes y fíos, victimes tamién d’esta mesma violencia machista.
A última hora, queremos que la violencia contra les muyeres se considere una Cuestión d’Estáu, que se forme a homes y muyeres pa qu’en caso de violencies machistes, tengan el grau de conciencia social que-yos dexe nun mirar escontra otru llau y sí denunciar cualquier casu de violencia.
Queremos que se dexe la demagoxa de si les muyeres asesinaes computen o nun computen nes estadístiques. Fueron asesinaes, ¡Claro que cunten! Cunten una hestoria de sometimientu, terror ya impotencia; de soledá, dependencia y dolor; cunten la falta de sofitos institucionales p’ayudar, cunten la falta d’empatía de xueces y fiscales…
Y mientres les muyeres sigan sufriendo violencia machista, la Organización de Muyeres Intersindical vamos siguir en llucha contra la violencia machista.

Madrid, 25 payares de 2015

Organización de Muyeres de la Confederación Intersindical

Unidades didácticas de Infantil y Primaria, Secundaria, Bachillerato y EPA (a través de ISSUU)

Unidades didácticas de Infantil y Primaria, Secundaria, Bachillerato y EPA (descarga directa PDF (10 Mb))