Manifiestu 8 de marzu: Dirixe la to película con guion feminista

Dende que nacemos, la biopic de les muyeres ta dirixida pol sistema patriarcal nel que vivimos. Cuando somos pequeñes, entamamos a rodar una película na que tendríamos de ser el personaxe principal, arrodiaes de secundarios. Pero la realidá ye otra: los roles de xéneru que la sociedá mos asigna asítiennos nun segundu planu, cuando non nel backstage, llugares bien dignos si son una eleición, pero non tantu si vienen impuestos ensin opción a retruque. Nel nuesu escenariu, esos personaxes secundarios terminen per atropar los diálogos, les escenes d’aición, les decisiones clave… Yá basta, ¡identifica les tos secuencies y deféndiles! ¡Qué la to película supere’l test de Bechdel ensin problemes!

Ye importante que decidas qué guion quies siguir y qué personaxe escueyes representar nesa, la to película. Yá sabemos que la base d’esi guion tien de ser feminista por que sías llibre, por que tengas les ferramientes abondes para valorate y dirixir el to rodaxe, para marcate metes o tomar decisiones que d’otra manera el patriarcáu va tomar por ti.

Esti 8M tu decides: la to banda sonora porque ye la que te fai sentir y espresar los tos sentimientos; los tos diálogos porque yes llibre de dicir lo que quieras; el desenvolvimientu del to personaxe porque yes capaz d’evolucionar como muyer nun mundu dirixiu por homes; pienses nun final abiertu porque quiciabes la vida póngate situaciones nel to camín inesperaes, pero que vas superar con nome de muyer, y a la fin, vas montar esa película feminista na que tu decidisti ser la única protagonista.

Con frecuencia, les muyeres llastramos un sentimientu de culpa inculcáu que mos llinda fainos mirar tras nel tiempu, siendo crítiques y dures con nós mesmes; creemos que fiximos mal esto o aquello porque esi sentimientu grabáu pa controlamos dende que salimos a escena acompáñamos y controla de manera sutil les nueses aiciones. Edúcasemos diciéndomos lo que podemos o tenemos de faer ya impónsenos un rol social que se revela como una llosa difícil de quitar d’enriba. Si creas la to propia película, los flashbacks tienen de ser para arriquecimientu personal y para evitar el machismu estructural o los micromachismos nos que nos movemos na nuesa cotidianidá diaria. Pa crecer y avanzar, tienes de proyeutar un flax-forward onde te veas empoderada y segura de les decisiones que tomasti na vida.

La escena 8M repitese cada añu y, sírvemos para recordar que somos munches les muyeres que siguimos lluchando por una igualdá real. Esi día tan simbólicu, ye un día pa sentise arguyosa y empoderada, para sentir la sororidá de les nueses compañeres de llucha ensin distinciones, y asina, alicar con fuerza les sensaciones que tienen de caltenese mientres tola to película.

Sobren diálogos cienematográficos nes nueses vides como estos:

• La protagonista “Yo nun yera interesante y él sí. Interesante… y brillante, misteriosu, perfeutu… y guapu” (Crepúsculu, 2008).
• Anastasia “Tengo dir a Nueva York col mio xefe por daqué del trabayu”.— Christian Grey: “la rempuesta ye NO” (50 Sombres de Grey, 2015)
• Protagonista femenina: “Aquí necesítense más manos de muyer, qué descuriose ye esti, ¿nun friega naide? — El protagonista: “Ya te dixi que faesme muncha falta” (El muyeriegu, 1963).

Esti 8M la Organización de Muyeres de la Confederación Intersindical va volver a les cais col nuesu moráu feminista por bandera, porque’l restu de banderes sóbrennos. Ye un día d’unión ente les muyeres, al marxe d’edaes, oríxenes, nacionalidaes…nel que van faltar 44 compañeres asesinaes en 2021 y en 2022 por violencia machista y nel que va haber madres que vivieron la violencia vicaria nes sos propies vides. Toes xuntes tenemos de crear el nuesu especial Festival de cine feminista, ¡toes nueses películes son finalistes y ganadores!

¡Viva el 8 de marzu!

¡Viva la llucha de les muyeres!

Madrid, 8 de marzu de 2022 | Organización de Muyeres de la Confederación Intersindical