Maltratu al profesoráu itinerante y la escuela rural

Tamos yá nel últimu trimestre del cursu y el profesoráu itinerante d’Asturies entá nun cobró lo que se-y debe dende setiembre. La Conseyería negóse de mano a cumplir l’acuerdu d’itinerancies  soscritu con delles orgnaizaciones sindicales y revocó a la baxa les solicitúes d’indemnización presentaes pol profesoráu colos criterios vixentes nel alcuerdu y tal como se venía faciendo dende hai quince años. Pidió-yos que rectificaren les sos piticiones estableciendo criterios de pagu nuevos, contrarios al alcuerdu y que rebaxaben enforma les cantiaes a cobrar. El profesoráu negóse a ello, sigui reclamando les cantidaes iniciales y movilizóse esixendo lo que se-y debe con asamblees, concentraciones delantre la Conseyería Educación y una caravana coches alredor d’ella.

Frutu de les movilizacines,  la Conseyería cambió de criteriu y prometió al profesoráu pagar les cantidaes debíes respetando l’alcuerdu itinerantes. Pa desplicar como diba pagar al traviés de nuevos impresos (que recoyíen nuevos conceptos) y la so xestión al traviés d’aplicaciones telemátiques, aconceyó coles direcciones de los CRAS (Centros Rurales Agrupaos) y sindicatos firmantes del alcuerdu.  Engañólos, pues a día de güei, cuasi acabando’l cursu, el profesoráu sigue ensin cobrar (en munchos casos cantidaes que perpasen los 1000€) y la xestión alministrativa de dellos pagos ye caótica.

 SUATEA fixo una consulta pelos centros con profesoráu itinerante y la variedá de situaciones demuestra’l caos de xestión: hai profesoráu (una minoría) al que se-y pagó cada dos meses toles cantidaes solicitaes colos nuevos impresos siguiendo los criterios antiguos que la Conseyería revocó a la mayoría; hai profesoráu que nun cobró nenguna cantidá; y esti mes de mayu, a otros/es págase-yos  mínimes cantidaes ( 82€ de los 800€ adeudaos, por exemplu). Y tamién esiste diversidá nestos últimos casos: a unos págase-yos en nómina baxo’l conceptu xenéricu d’itinerancia y a otros fáise-yos l’ingresu en bancu ensin constar na nómina. En nengún casu consta’l períodu bimensual al que correspuende’l pagu.  Esta situación yá pasa a ser insostenible, demuestra la incompetencia xestora de la Conseyería Educación, maltrata y degrada’l trabayu del profesoráu itinerante, atenta contra los sos derechos llaborales ya indirectamente desprecia les escueles rurales.

Ye urxente ya imprescindible acabar con esta discriminación y caos. Por ello, SUATEA  desixe a la Conseyería’l pagu inmediatu de les cantidaes adeudaes al profesoráu itinerante,  la liquidación mensual de les siguientes indemnizaciones, l’aumentu de la indemnización económica por Km percorríu y completar la cobertura del seguru del coche hasta tou riesgu con sustitución del vehículu en casu accidente;  y apoya les movilizaciones convocaes pol profesoráu itinerante a lo llargo esti mes de mayu:

• Concentraciones tolos xueves pela tarde ente les 15 y les 17 hores delantre les cases de conceyu a les que pertenecen les escueles con profesoraú itinerante pidiendo l’apoyu esplícitu al traviés de mociones monicipales.
• Concentración el xueves 26 de mayu, a les 18 hores delantre la Conseyería Educación.

El secretariáu de SUATEA

Uviéu a 4 de mayu de 2016