Machismu x Negacionismu = VIOLENCIA ²

Toles selmanes los homes machistes maten a muyeres, afrellen a muyeres, fiérenles de gravedá, viólenles, acósenles. Dalgunes d’eses selmanes los homes machistes asesinen a más d’una. Los partíos políticos d’estrema derecha y otres persones ensin filiación política, conscientes polo menos, nieguen estos fechos cuando esanicien l’axetivu “machista” pretendiendo aparentar que se trata de violencia a seques o “xenérica”; que los  homes nun maten a les muyeres por ser muyeres, sinón que la violencia ye aleatoria,  inespecífica, y amenaza a cualesquier ser humanu. Esto ye, que si les víctimes son muyeres ye frutu de la casualidá y non frutu d’una estructura social diseñada pa favorecer a unos y someter a otres. Eso ye negar la esistencia de la violencia machista y NEGAR LA VIOLENCIA MACHISTA FAITE CÓMPLIZ.

Por ello, ye necesario denunciar cada asesinatu machista y recordar el númberu y los nomes de les que yá nun tán. Dende equí’l nuesu sofitu y reconocencia a les Muyeres de La Escandalera pola so llucha constante.

LLISTÁU DE FEMINICIDIOS Y OTROS ASESINATOS DE MUYERES N’ESPAÑA 2023

Fonte: Feminicidio.net https://feminicidio.net/llistáu-de-feminicidios-y-otros asesinatos-de muyeres cometíos-por homes-en-espana-en-2023/

Dende’l 2009 hasta’l 2022 interpunxéronse más de dos millones de denuncies  por violencia contra la muyer nel Estáu español. Ye importante destacar que menguó’l númberu de muyeres asesinaes que denunciaren al so agresor.

La denuncia ye un primer pasu, pero nin ye un fácil nin ye l’únicu.  Les persones que trabayen na atención a muyeres víctimes de violencia machista conocen de primera mano los fallos esistentes nel sistema de protección. Les midíes de prevención y protección nun concernen solo a un Ministeriu, sinón qu’impliquen la planificación y actuación coordinada de delles instituciones y una dotación de personal especializáu pa que’l Pactu d’Estáu sía realmente eficaz.

Como sabemos, la violencia machista paez ser una invariante antropolóxica que s’estiende a lo llargo del tiempu y l’espaciu y que se perpetúa y espresa n’ensame de formes:

N’España hai 2,5 millones de muyeres con discapacidá. El 20% de les muyeres asesinaes por violencia machista anguaño teníen dalguna discapacidá acreditada. De manera que’l riesgu de sufrir violencia machista ye cuatro vegaes mayor que nel restu de la población femenina. En dellos casos, la discapacidá ta causada pola violencia exercida contra la muyer mientres l’embaranzu, causando tamién mancadures nel fetu.

A nivel européu, un titular calificaba con suspensu al continente:  “en lexislación sobre violencia machista: El 22% de les muyeres sufrieron violencia de xéneru”. Ente les universitaries, dos de cada trés, pertenecientes a dalgún de los estaos miembros, sufrieron violencia machista; solo’l 13% denuncia. Los estudios realizaos non solo falen d’una violencia estendío y normalizao en tolos campus europeos, sinón tamién invisibilizada.

Les muyeres racializaes y migrantes son les más vulnerables pola situación d’irregularidá alministrativa na que les caltienen (trata con fines d’esplotación sexual), la dependencia por falta de recursos económicos, la precariedá llaboral alternativa a la prostitución y el desconocimientu del idioma, ente otros factores.

N’África, el nivel de violencia sexual ye 14 puntos más altu que  n’Europa.

El “hiyad” ye un elementu de control contra les muyeres, como los matrimonios forzaos, los crímenes d’honor o’l refugo familiar – esclusión de la comunidá son dalgunos de los riesgos a los que s’esponen les muyeres musulmanes.

Nel sudeste asiáticu muerren más muyeres por estos crímenes qu’en conflictos armaos. Les víctimes crecen a midida que reivindiquen los sos derechos.

América Llatina atópaser n’alerta máxima pol aumentu de feminicidios. Dempués de la pandemia, los asesinatos de muyeres disparáronse magar de los esfuerzos sociales y de les entidaes públiques.

Nun queremos, nin debemos, dexar de denunciar el sistema de dominación patriarcal qu’imponen y perpetúen los distintos dogmes relixosos. Toles relixones son machistes. 

Nes Sagraes Escritures de la relixón católica, la más practicada nel nuesu Estáu, podemos lleer les siguientes perlles: “La nacencia d’una fía ye una perda” (Eclesiastés 22,3). “Vas Parir los tos fíos con dolor. El to deséu va ser el del to home y él va tener autoridá sobre ti” (Xénesis)

Na Torá: “Benditu sías Dios, Rei del Universu, porque tu nun me fixisti muyer”

Nel Corán: “Los homes son superiores a les muyeres, por causa de les cualidaes poles qu’ Alá alzó estos percima d’aquelles”

En munchos países, inclusive non democráticos, la relixón sigue encuallada nes sos instituciones y sigue penalizando la vida de les muyeres, furtiándo-yos derechos como l’accesu a la educación, al albuertu o a l’anticoncepción, ente otros; obligándoles a casase por comenencies, a tapase de la cabeza a los pies, a callar y curiar.

Pero agora hai una nueva ferramienta que, magar sigue ensin tar al algame de toes, sirvió pa dar voz a munches: les redes sociales.

#MeToo #SeAcabo

La periodista Cristina Fallarás, no que fai a lo asocedío cola futbolista Jenny Hermoso, abrió la posibilidá de que cientos de muyeres denunciaren públicamente l’acosu y la violencia sexual a que tuvieron sometíes nel mundu llaboral. Pero tamién atopamos relatos d’abusos na infancia, dientro del ámbitu familiar.

Bien ye sabío que les redes sociales, en cuantes que ferramienta, tamién valen pa perpetuar les estructures de dominación sobre les muyeres, y naide dulda del so descomanáu poder d’espardimientu ya influencia, aparentemente incontrolable.  A manera d’introducción, p’averase y cavilgar sobre esta nueva realidá, nun dexéis de ver los dos primeros episodios de la serie documental “Generación Porno” dirixida por Oiane Sagasti que cunta con testimonios d’adolescentes, les sos families y persones espertes en sexu, relaciones sexuales y accesu a conteníos pornográficos. La educadora social Marina Marroquina, ente collaboraciones qu’apaecen nos dos primeros capítulos, ufierta datos abondo alarmantes como pa empeza a actuar: el 88% de los vídeos porno online contien violencia física contra les muyeres. Los llibros d’esta especialista en violencia contra les muyeres son d’obligada llectura: MARROQUÍN, M. (2017). Eso nun ye amor: 30 retos pa trabayar la igualdá. Planeta. y (2021)  Eso nun ye sexu:  ¡Otra educación sexual ye urxente! Destín. Tamién encamentamos la webinar de la Organización de Muyeres, impartida por Mónica Alario Gavilán al traviés de la nuesa canal de la Confederación Intersindical.    

Por tollo, dende la Secretaría de la Muyer de la SUATEA y l’Organización de Muyeres de la Confederación Intersindical esiximos una formación feminista obligatoria qu’incluya, de momentu, la educación sexual per parte de formadores espertes na materia. 

https://www.eitb.eus/es/nahieran/documentales/generacion-porno/5748/